وفاقی وزیر اطلاعات مریم اورنگزیب نے کہا ہے 9 فروری کو ہونے والی اے پی سی پھر مؤخر کر دی گئی ہے۔ وجہ بتاتے ہوئے ان کا کہنا تھا وزیر اعظم شہباز شریف کے دورہ ترکیہ کے باعث دہشت گردی کے مسئلے پر ہونے والی آل پارٹیز کانفرنس مؤخر کر دی گئی ہے۔
مریم اورنگزیب نے اپنے ٹوئٹر اکاؤنٹ پر بتایا کہ وزیراعظم کل صبح انقرہ روانہ ہوں گے، اے پی سی کی آئندہ تاریخ کا اعلان اتحادیوں کی مشاورت سے بعد میں کیا جائےگا۔
وزیراعظم شہباز شریف کل صبح انقرہ روانہ ہوں گے، وہ صدر اردوان سے زلزلے کی تباہی، جانی نقصان پر افسوس اور تعزیت،ترکیہ کے عوام سے یک جہتی کریں گے۔ وزیراعظم کے دورہ ترکیہ کی وجہ سے جمعرات 9 فروری کو بلائی گئی اے پی سی مؤخر کی جا رہی ہے، اتحادیوں کی مشاورت سے نئی تاریخ کا اعلان ہوگا
— Marriyum Aurangzeb (@Marriyum_A) February 7, 2023
ترکیہ میں زلزلے کی تباہی کے بعد وزیراعظم شہباز شریف اور وزیر خارجہ بلاول بھٹو زرداری نے ترکیہ جانےکا فیصلہ کیا ہے۔ وزیر اعظم اور وزیرخارجہ کے دورے کا مقصد مصیبت کی گھڑی میں اظہار ہمدردی کرنا ہے، وزیراعظم شہباز شریف ترک صدر طیب اردوان سے بھی ملاقات کریں گے ۔
یاد رہے کہ 7 فروری کو طلب کی گئی اے پی سی کو 9 فروری تک مؤخر کیا گیا تھا۔ ایجنڈے میں دہشت گردی کے مسئلے کے حل اور معاشی مسائل شامل ہیں۔
عسکری قیادت دہشت گردی کی حالیہ لہر پر شرکا کو بریفنگ دے گی،کانفرنس میں درپیش چیلنجز کےلیے مشترکہ حکمت عملی مرتب ہوگی اور دہشت گردی سے مؤثر طور پر نمٹنے کے لیے نیشنل ایکشن پلان پر نظرثانی ہو گی
حکومت معاشی مسائل سے نمٹنے کے لیے اکنامک روڈمیپ پیش کرے گی جبکہ وزیرخزانہ اور ان کی ٹیم آئی ایم ایف سے مذاکرات پر اعتماد میں لے گی۔
