چیئرمین تحریک انصاف عمران خان نے سپریم کورٹ سے وکیل عبدالرزاق شر قتل کیس کی سماعت کوئٹہ کی بجائے اسلام آباد عدالت میں مقرر کرنے کی استدعا کر دی ہے۔
چیئرمین تحریک انصاف عمران خان نے سپریم کورٹ میں متفرق درخواست دائر کی ہے اور عدالت سے استدعا کی ہے کہ سپریم کورٹ اسلام آباد سیٹ ہر مقدمے کی سماعت کی جائے، درخواست کی سماعت کل ہی کی جائے۔
درخواست میں مؤقف اختیار کیا گیا ہے کہ درخواست گزار زندگی کو خطرے کے پیش نظر کوئٹہ کا سفر نہیں کرسکتا، مقدمے کی سماعت اسلام آباد پرنسپل سیٹ میں کی جائے اور درخواست کی سماعت کل ہی کی جائے۔
واضح رہے کہ کوئٹہ کے وکیل عبدالرزاق شر قتل کیس میں چیئرمین تحریک انصاف عمران خان کو نامزد کیا گیا تھا۔
عمران خان نے اس کیس میں نامزدگی کو بلوچستان ہائیکورٹ میں چیلینج کیا تھا تاہم بلوچستان ہائی کورٹ نے عمران خان کی درخواست مسترد کر دی تھی۔
بلوچستان ہائیکورٹ نے اپنے فیصلے میں کہا تھا کہ ایڈووکیٹ عبدالرزاق شر قتل کی جے آئی ٹی تشکیل دی جا چکی ہے جبکہ وقوعہ کے مختلف پہلوؤں کی تفتیش جے آئی ٹی کی جانب سے ہونا باقی ہے اس مرحلے پرتفتیش کے عمل کو نہیں روکا جا سکتا۔
