گورنر خیبر پختونخوا غلام علی نے کہا ہے کہ پاک چین دوستی پر پاکستانی قوم کو فخر ہے کیوں کہ چین پاکستان کا مشکل وقت کا دوست ہے۔
سی پیک کی 10 ویں سالگرہ تقریب سے خطاب کرتے ہوئے گورنر غلام علی نے کہا کہ ہمیں اپنی 75 سالہ تاریخ پر نظر دوڑانی چاہیے کہ ہم نے کیا کھویا اور کیا پایا۔ سب سے پہلے ہمیں ایک پاکستانی بن کر سوچنا ہوگا۔
مزید پڑھیں
انہوں نے کہا کہ اس وقت چاروں صوبوں، تمام سیاسی جماعتوں کو معیشت پر ایک ہونا چاہیے۔ ہمیں جدید ٹیکنالوجی سے استفادہ کرنا ہوگا۔ اگر منصوبہ بندی نہیں ہو گی تو ہماری صنعتیں مزید مشکلات کا شکار ہوں گی۔
گورنر غلام علی نے کہا کہ بزنس کمیونٹی کو کوالٹی پر کمپرومائز نہیں کرنا چاہیے۔ ایک شخص اگر غلطی کرتا ہے تو وہ پورے ملک کے لیے بدنامی کا سبب بنتا ہے۔ سی پیک پاکستان اور سنٹرل ایشیا ممالک کے لیے خوشحالی لے کر آئے گا۔
ان کا کہنا تھا کہ تمام اداروں کو ایمانداری کے ساتھ کام کرنا ہوگا۔ چین نے جس طرح ترقی کی ہے ہمیں اس سے سبق حاصل کرنا ہوگا۔ اگر ہم خلوص دل سے کام کریں تو کوئی پاکستان کا مقابلہ نہیں کرسکتا۔
