ایف آئی اے کے بڑی کارروائی، جعلی ویزہ پر کینیڈا جانے والا مسافر ایجنٹوں سمیت گرفتار

ایف آئی اے امیگریشن نے کراچی ایئرپورٹ پر بڑی کارروائی عمل میں لاتے ہوئے جعلی وزٹ ویزے پر کینیڈا جانے والے مسافر کو گرفتار کر لیا، تاہم مسافر کی نشاندہی پر ہی مذکورہ ایجنٹوں کو بھی گرفتار کر لیا گیا۔

ایف آئی اے کے مطابق کراچی ایئرپورٹ سے فلائٹ نمبر 783 پر کینیڈا جانے والا مسافر آف لوڈ کیا گیا، مسافر کے پاکستانی پاسپورٹ پر کینیڈا کا جعلی ویزا لگا ہواتھا۔

ابتدائی تحقیقات کے مطابق آف لوڈ کیے جانے والے مسافر نے ایئرپورٹ پر ہی مذکورہ ایجنٹوں کی نشاندہی کی، مسافر نے بتایا کہ 20 لاکھ کے عوض مذکورہ ویزا ایجنٹوں سے ویزا حاصل کیا تھا۔

ترجمان ایف آئی اے کے مطابق مسافر نے ایجنٹ کو 20 لاکھ روپے آن لائن ٹرانسفر کیے تھے، مسافر کی نشاندہی پر ایجنٹ فیاض حسین اور سالک شریف ایئرپورٹ کی پارکنگ میں ہی موجود تھے جہاں سے انکو گرفتار کیا گیا۔

گرفتار ملزمان کو مزید کارروائی کے لئے اینٹی ہیومن ٹریفکنگ سرکل کراچی منتقل کر دیا گیا ہے، ڈپٹی ڈائریکٹر امیگریشن علی مراد نے بروقت کارروائی کرنے پر ٹیم کی کارکردگی کو سراہا۔