پولیس نے شیخوپورہ اور قصور میں ذخیرہ اندوزوں کے خلاف کارروائی کرتے ہوئے گوداموں میں چھپایا گیا 63 کروڑ روپے سے زائد مالیت کا تیل اور کئی آئل ٹینکرز ضبط کرلیے۔
شیخوپورہ پولیس کے مطابق پیٹرول مافیا نے پیٹرول سے بھرے آئل ٹینکرز گوداموں میں چھپائے ہوئے تھے جہاں چھاپہ مار کر آپریشن کر کے 30 کروڑ روپے مالیت کا پیٹرول برآمد کیا اور درجن بھر آئل ٹینکرز بھی قبضے میں لے لیے۔
قصور کے علاقوں پتوکی اور پھولنگر میں بھی آپریشن کیا گیا جہاں سے دو ڈپوز سے 33 کروڑ روپے سے زائد مالیت کا 13 لاکھ لیٹر تیل اور ڈیزل برآمد کیا جبکہ پولیس نے 10 سے زائد آئل ٹینکرز بھی قبضہ میں لے لیے۔ پولیس کا کہنا ہے کہ گرفتار ہونے والے ملزمان و ذمہ داران کے خلاف مقدمات درج کیے جارہے ہیں۔
یاد رہے کہ وزیر مملکت پیٹرولیم مصدق ملک نے پیٹرول اور ڈيزل کی قلت پیدا کرنے والوں کو خبر دار کرتے ہوئے کہا تھا کہ ذخیرہ کرنے والے پمپس کے لائسنس منسوخ کردیے جائیں گے۔
