ملازمت کی تلاش میں سرگرداں نوجوانوں کے لیے سماجی رابطے کی ویب سائٹ ’ٹوئٹر‘ ایک نیا فیچر لانچ کرنے جا رہی ہے جس سے نوجوان اپنی مطلوبہ ملازمت تلاش کر سکیں گے اور کمپنیاں اپنے مطلوبہ ملازم کو ڈھونڈنے میں کامیاب ہو سکیں گی۔
سماجی رابطے کی ویب سائٹ ٹوئٹر نے خود تو اس نئے فیچر کے بارے میں فی الحال کوئی باضابطہ اعلان نہیں کیا تاہم نیما اوجی نامی ایک ایپ ریسرچر نے ٹوئٹر پر ہی ایک ٹویٹ کیا ہے جس میں اس نے اس نئے فیچر کے بارے میں کچھ معلومات شیئر کی ہیں۔
ریسرچر نے لکھا ہے کہ ایلون مسک کی ملکیت والی کمپنی مبینہ طور پر سوشل میڈیا پلیٹ فارم پر نئے نئے فیچر شامل کرنے میں مصروف عمل ہے۔
#Twitter will let verified organizations import all of their jobs to Twitter by connecting a supported ATS or XML feed! 🚀
"Connect a supported Applicant Tracking System or XML feed to add your jobs to Twitter in minutes." pic.twitter.com/TSVRdAoj3h
— Nima Owji (@nima_owji) July 20, 2023
ریسرچر نے لکھا کہ ٹویٹر کا یہ نیا فیچر لنکڈاِن جیسی خصوصیات کا حامل ہوگا جس پر ملازمت کے متلاشی صارفین اپنی مطلوبہ ملازمت حاصل کرنے کے لیے کمپنیوں سے رابطہ کر سکیں گے اور کاروباری کمپنیاں بھی اپنی متعلقہ ضروریات کے لیے مائیکرو بلاگنگ سروس استعمال کر سکیں گی۔
ٹوئٹر ہائرنگ کیا ہے اور یہ کیسے کام کر سکتا ہے؟
نیما اوجی نامی ایپ ریسرچر نے ٹوئٹر پر ایک غیر ریلیز فیچرشیئر کیا اور لکھا کہ یہ ٹوئٹر کے اس نئے فیچر کا نام ’ٹوئٹر ہائرنگ‘ ہو سکتا ہے اور یہ کسی کے لیے مخصوص نہیں ہوگا بلکہ کوئی بھی صارف ملازمت اور ملازمین کی تلاش میں کاروباری کمپنی اس سے استفادہ کر سکے گی۔
اوجی نے اس نئے فیچر کا ایک اسکرین شاٹ بھی شیئر کیا ہے جس میں نوٹ کیا گیا ہے کہ یہ فیچر صرف مصدقہ کاروباری کمپنیاں ہی استعمال کر سکیں گی۔ اوجی کا کہنا ہے کہ اس سے صارفین ملازمتیں منٹوں میں تلاش کی جا سکیں گی۔
کاروباری کمپنیاں اپنے پروفائلز پر ملازمتوں کو نمایاں کر کے پیش کرسکیں گی تاکہ باصلاحیت امیدواروں کو متعلقہ عہدوں کے لیے فوری راغب کیا جا سکے۔ مزید یہ کہ صارفین اپنے پروفائل پیج پر براہ راست ملازمتیں نمایاں کرنے کے لیے 5 ٹویٹس پوسٹ کر سکیں گے۔
واضح رہے کہ ٹوئٹر اس وقت میدان عمل میں گوگل، ایپل اور میٹا جیسی سوشل کمپنیوں کا مقابلہ کرنے کے لیے مختلف فیچر لانچ کرنے کی جدوجہد میں مصروف عمل ہے۔ اب ٹوئٹر نے اپنے مقابلے کی فہرست میں لنکڈاِن کو بھی شامل کر لیا ہے۔
