سابق وزیراعظم نوازشریف سعودی عرب سے واپس دبئی پہنچے ہیں جبکہ سابق صدر آصف علی زرداری اور وزیر خارجہ بلاول بھٹو پہلے سے دبئی موجود ہیں، دونوں رہنماؤں کی ملاقات متوقع ہے۔
سابق صدر آصف علی زرداری گزشتہ روز خصوصی طیارے سے دبئی پہنچے تھے، ذرائع کے مطابق آصف علی زرداری چند دن دبئی میں قیام کے بعد وطن واپس آئیں گے۔ دبئی میں مسلم لیگ ن اور پیپلز پارٹی کی قیادت کی ملاقات ہوگی جس میں نگران سیٹ پر اہم مشاورت ہوگی اور نگراں وزیراعظم کا نام فائنل کیا جائے گا۔
دوسری جانب 24 جون سے دبئی میں موجود مسلم لیگ ن کی چیف آرگنائزر مریم نواز دبئی اور سعودی عرب کے دوروں کے بعد رات گئے پاکستان واپس پہنچ گئی ہیں۔
مزید پڑھیں
مریم نواز نے دبئی میں والد نوازشریف کے ہمراہ اہم ملاقاتیں کی تھیں، وہ اپنے والد کے ہمراہ دبئی سے سعودی عرب روانہ ہوئی تھیں، سعودی عرب میں بھی اہم شخصیات کے ساتھ ملاقاتوں میں مریم نواز شریک رہی ہیں۔
واضح رہے کہ مریم نواز کی وطن واپسی ایسے وقت میں ہوئی ہے جب بڑی سیاسی جماعتوں میں اسمبلی کی تحلیل، نگراں حکومت کا قیام اور عام انتخابات کے دیگر اہم امور سے متعلق مشاورت کے لیے بات چیت جاری ہے۔
