گرین پاکستان انیشی ایٹو کے فلیگ شپ پراجیکٹ ’خانیوال ماڈل ایگریکلچر فارم‘ کی افتتاحی تقریب کا انعقاد آج ہوگا، جس کے مہمان خصوصی وزیر اعظم پاکستان محمد شہباز شریف ہوں گے جبکہ چیف آف آرمی اسٹاف جنرل سید عاصم منیر بھی تقریب میں شرکت کریں گے۔
اطلاعات کے مطابق تقریب میں وزرائے خزانہ، دفاع، پلیننگ ڈویلپمنٹ اینڈ سپیشل انیشی ایٹو، نیشنل فوڈ سیکیورٹی اینڈ ریسرچ، اطلاعات، صوبائی حکومتوں کے چیف سیکریٹریز، زرعی ماہرین، قابلِ ذکر کسانوں اور فوج کے اعلیٰ افسران بھی شرکت کریں گے۔
افتتاحی تقریب میں برطانیہ، اٹلی، سپین، چین، بحرین، قطر، سعودی عرب، متحدہ عرب امارات، ترکیہ اور دیگر ممالک سے غیر ملکی معززین اور ممکنہ سرمایہ کاروں کی بھی شرکت متوقع ہے۔
لینڈ انفارمیشن مینجمنٹ سسٹم اینڈ سینٹر آف ایکسی لینس کے قیام کے بعد فوڈ سیکیورٹی پر منعقد ہونے والے قومی سیمینار میں گرین پاکستان انیشی ایٹو کا آغاز ہوا تھا۔
اس فلیگ شپ فارم کا افتتاح اس بات کو یقینی بنانے کے لیے ایک کوشش ہوگا کہ پاکستان نہ صرف خوراک کو محفوظ بنانے بلکہ کثیر برآمدات کے لیے خاطر خواہ پیداوار کو یقینی بنا کر قومی معیشت کو دوام بخشے گا۔
زرعی ماہرین بشمول کھیت، فصلوں، باغات، اسپیشلٹی کور، ٹیکسٹائل اور لائیو سٹاک کے شعبوں سے تعلق رکھنے والے ماہرین بھی تقریب میں شرکت کرینگے۔ حکومتی نمائندوں، ماہرِ تعلیم، صنعتکاروں اور ممکنہ سرمایہ کاروں کی شرکت بھی متوقع ہے۔
اس فلیگ شپ پراجکٹ کا ہدف سرکاری اور نجی شعبوں کے اشتراک کے ساتھ ساتھ مقامی کسانوں کو غذائی تحفظ فراہم کرنا ہے۔
تفصیلات کے مطابق انتہائی قلیل وقت میں جدید ترین فارم قائم کرنے اور پاکستان میں زراعت کی نئی سطح کو متعارف کرانے میں فون گرو اور فوجی فاؤنڈیشن کا اہم کردار ہے.
آرمی چیف ‘گرین پاکستان انیشی ایٹو’ اور فون گرو کے احسن اقدامات اور زرعی اصلاحات کی بحالی کے لیے حکومتِ پاکستان کو پاک فوج کی جانب سے ہرممکن تعاون فراہم کرنے کا یقین دلا چکے ہیں۔
