سندھ ہائیکورٹ نے لاپتا افراد کی تفصیلات پرنٹ اور الیکٹرانک میڈیا پر نشر کرنے کا حکم دے دیا۔
میڈیا رپورٹ کے مطابق لاپتا افراد کی بازیابی سے متعلق کیس کی سماعت سندھ ہائیکورٹ میں ہوئی، عدالت نے شہریوں کی عدم بازیابی کے معاملے کا آئی جی سندھ کو جائزہ لینے کا حکم دیا ہے۔ عدالت نے ریمارکس میں کہا کہ تفتیشی افسر کی کارکردگی افسوس ناک ہے۔
گزشتہ سماعت پر بھی سندھ ہائی کورٹ نے اعلی افسران کی خراب کارکردگی پر برہمی کا اظہار کیا تھا، حکام نے ہوم سیکرٹری کے دستخط کے بغیر ہی رپورٹ فاضل جج کے سامنے پیش کر دی تھی۔
جسٹس نعمت اللہ پھلپھوٹو نے ریمارکس دیئے کہ ہوم سیکرٹری کے دستخط کیوں نہیں رپورٹ پر؟ ہوم سیکرٹری کے دستخط اہم ہوتے ہیں ۔ کیا وارنٹ گرفتاری جاری کریں گے تب وہ دستخط کریں گے ؟ ہوم سیکرٹری سے کہیں وارنٹ کے بغیر ہی رپورٹ پر دستخط کریں ۔
عدالت نے ریمارکس دیئے تھے کہ لاپتا افراد کی بازیابی سے متعلق تمام وسائل بروئے کار لائے جائیں ۔
