پاکستان تحریک انصاف (پی ٹی آئی) کے چیئرمین عمران خان نے کہا ہے کہ مجھے چاہے جیل میں ڈالیں یا نااہل کردیں انتخابات میں تحریک انصاف کلین سویپ کرے گی، کوئی طاقت عوام کے دلوں سے پی ٹی آئی کی محبت ختم نہیں کر سکتی۔
جمعرات کو ویڈیو لنک سے خطاب کرتے ہوئے انہوں نے کہا کہ عارضی طور پر دہشت پھیلا کر لوگوں کو چپ تو کرایا جا سکتا ہے مگر یہ ممکن نہیں کہ انتخابات میں قوم کا مقابلہ کیا جا سکے کیوں کہ موجودہ حکمرانوں کے خلاف عوام کے دلوں میں غم وغصہ ہے۔
چئیرمین تحریک انصاف عمران خان کا مصائب، مشکلات، ظلم، تشدد، فسطائیت کے باوجود ڈٹ کر کھڑے رہنے اور نہ ٹوٹنے والے لیڈران اور کارکنان کو خراج تحسین۔ pic.twitter.com/rEDfxSeNsP
— PTI (@PTIofficial) July 27, 2023
سابق وزیراعظم نے کہا کہ میرے مخالفین جتنے بھی حربے استعمال کر رہے ہیں اس کا پی ٹی آئی کو فائدہ ہو رہا ہے۔
پی ٹی آئی چیئرمین نے کہا کہ اس ملک میں تحریک انصاف کی حمایت کرنا جرم بن گیا ہے، یہاں تک کے شوکت خانم جیسے ادارے کو بھی معاف نہیں کیا جا رہا۔
اسٹیبلشمنٹ اور حکمرانوں کے خلاف اکیلا کھڑا ہوں
عمران خان نے کہا کہ میں اسٹیبلشمنٹ اور حکمرانوں کے خلاف اکیلا کھڑا ہوں اور یہ صرف ایمان کی بنیاد پر ہے۔ یہ جو بھی چال چلتے ہیں خود اس میں پھنس جاتے ہیں اور سچ سامنے آ جاتا ہے۔
انہوں نے کہا کہ نیب برطانیہ سے سپریم کورٹ کے اکاؤنٹ میں آنے والی رقم کے حوالے سے تحقیقات کر چکا ہے اور جب اسے کچھ نہیں ملا تو انکوائری بند کر دی گئی۔ جب ایک انکوائری بند ہو جائے تو دوبارہ کھولی ہی نہیں جا سکتی۔
سابق وزیراعظم نے کہا کہ توشہ خانہ کیس میں مجھ سے وہ سوالات پوچھے جا رہے ہیں جو آج تک کسی سے نہیں پوچھے گئے۔ جب میں نے رقم ادا کر کے تحفہ لے لیا تو پھر میری مرضی جسے مرضی دے دوں۔
چئیرمین تحریک انصاف عمران خان کی توشہ خانہ کیس پر تفصیلی گفتگو pic.twitter.com/TRyJEjE510
— PTI (@PTIofficial) July 27, 2023
پی ٹی آئی چیئرمین نے کہا کہ امریکا سے آنے والے سائفر کو میں نے نیشنل سیکیورٹی کونسل کے اجلاس میں رکھا جہاں کہا گیا کہ امریکا کو ہمارے معاملات میں مداخلت نہیں کرنی چاہیے۔
سابق وزیراعظم نے کہا کہ میری حکومت ایک سازش کے تحت گرائی گئی جس کے بعد اشیا کی قیمتوں میں ہوشربا اضافہ ہو گیا، آٹا، چینی، دودھ سمیت ہر چیز کی قیمت کو آگ لگی ہوئی ہے۔
انہوں نے کہا کہ پی ٹی آئی کی خواتین پر اس لیے تشدد کیا جا رہا ہے کہ باقی عورتیں بھی گھروں سے نہ نکلیں۔ میرا سوال ہے کہ ایسی صورت میں انسانی حقوق کی تنظیمیں کہاں غائب ہیں۔
علی محمد خان کی رہائی پر مجھے خوشی ہوئی
عمران خان نے کہا کہ علی محمد خان کی رہائی پر مجھے خوشی ہے، کسی کے پاس کوئی ثبوت ہی نہیں تھا کہ علی محمد خان 9 مئی کے واقعہ میں ملوث تھا، یہی کیس شہریار آفریدی کا ہے اس کی بھی ضمانت منظور ہو چکی ہے۔
انہوں نے کہا کہ جو لوگ تمام تر مشکلات برداشت کرنے کے باوجود ڈٹے ہوئے ہیں میں ان کو سلام پیش کرتا ہوں۔
عمران خان نے خواجہ آصف کا نام لیے بغیر ان پر تنقید کرتے ہوئے کہا یہ ایسا شخص ہے جو 2018 میں الیکشن ہار رہا تھا اور پھر جنرل باجوہ کو ٹیلیفون کر کے الیکشن میں کامیابی حاصل کر لی، یہ ہمیشہ خواتین کے خلاف نازیبا زبان استعمال کرتا ہے، اب بھی اس نے ایسے ہی کیا اور جواب دینے پر ڈاکٹر زرقا کے کلینکس سیل کر دیے گئے۔
ڈاکٹر زرقا نے ایک رنگ باز جو کہ خواتین پر ہر وقت بدتمیزی، گھٹیا اور غلیظ زبان استعمال کرتا ہے، اس کو جواب دیا تو اس کے لاہور میں دو کلینک کو سیل کر دیا گیا، ڈاکٹر سیمہ کا کراچی میں کلینک بند کر دیا اور سیماب طاہر کے گھر پولیس پہنچ گئی، ایسا ظلم کون کرتا ہے؟ چئیرمین عمران خان pic.twitter.com/Co2eooGeEK
— PTI (@PTIofficial) July 27, 2023
انہوں نے مزید کہا کہ اس وقت فسطائیت کا دور ہے، پاکستان کے نامور صحافی ملک سے باہر ہیں اور عمران ریاض کے بارے میں کچھ خبر ہی نہیں کہ وہ کہاں پر ہے۔
