گزشتہ روز وزیراعظم شہباز شریف ایک روزہ دورے پر بلوچستان کے ساحلی شہر گوادر پہنچے۔ دورے کے موقع پر وزیراعظم کے ہمراہ چیف آف آرمی اسٹاف جنرل عاصم منیر سمیت دیگر اعلی سول و عسکری افسران موجود تھے۔ وزیراعظم نے اپنے مختصر دورے میں گوادر میں عوامی نوعیت مختلف منصوبوں کا افتتاح کیا جبکہ دیگر کئی اہم منصوبوں کا جائزہ بھی لیا۔
وزیراعظم شہباز شریف کے دورے کے موقع پر گوادر ایئرپورٹ پر گورنر بلوچستان عبدالولی خان کاکڑ اور چیف سیکریٹری بلوچستان عبدالعزیز عقیلی سمیت دیگر اعلی سول و عسکری حاکم نے وزیراعظم کا استقبال کیا۔ اس موقع پر وزیراعلیٰ بلوچستان میر عبدالقدوس بزنجو سمیت کابینہ کے دیگر اراکین غائب رہے۔
ذرائع کے مطابق وزیر اعلی بلوچستان میر عبدالقدوس بزنجو وفاق کی سرد مہری کی وجہ سے وزیراعظم شہباز شریف سے نالاں ہیں۔ وزیر اعلی بلوچستان کا موقف ہے کہ وفاق کی جانب سے صوبائی حکومت کو این ایف سی ایوارڈ کی مکمل رقم ادا نہیں کی گئی۔
اس کے علاوہ پاکستان پیٹرولیم لمیٹڈ کی جانب سے 50 ارب روپے سے زائد کے واجبات کی عدم ادائیگی سمیت سیلاب متاثرین کی مدد کے لیے اعلان کردہ 10 ارب روپے جاری نہیں کیے گیے جس کی وجہ سے صوبے کے مالی مسائل میں اضافہ ہوتا جارہا ہے۔
ذرائع کے مطابق گزشتہ برس سیلاب کے باعث صوبے کی اہم شاہراہوں کے بہہ جانے پر نیشنل ہائی وے اتھارٹی نے ان شاہراہوں کی مرمت کا وعدہ کیا لیکن متعدد یاد دہانی کے باوجود یہ وعدہ وفا نہ ہوسکا۔
وزیراعظم شہباز شریف کے دورے پر شدید تحفظات کا اظہار کرتے ہوئے وزیراعلی بلوچستان میرعبدالقدوس بزنجو کا موقف ہے کہ ایسے دوروں میں پیسوں کا شدید ضیاع ہوتا ہے اگر یہی رقم عوامی فلاح و بہبود کے کاموں پر خرچ کی جائے تو زیادہ بہتر ہے۔
