نیشنل آرکائیو ڈیجیٹل ہوچکا اب ریڈیو پاکستان کو ڈیجیٹل کریں گے، مریم اورنگزیب

وفاقی وزیر اطلاعات مریم اورنگزیب نے کہاکہ ریڈیو پاکستان کا تمام نیشنل آرکائیو ڈیجیٹل ہو چکا ہے، جلد ہی ڈیجیٹل ریڈیو منڈال کا آغاز کرنے جا رہے ہیں، جس کا افتتاح وزیر اعظم شہباز شریف اگلے چند دنوں میں کریں گے۔

وفاقی وزیر اطلاعات مریم اورنگزیب نے ریڈیو پاکستان کی ڈیجیٹلائزیشن کی تقریب سے خطاب کرتے ہوئے کہاکہ ریڈیو پاکستان آج ایک انتہائی اہم سنگ میل عبور کرنے جا رہا ہے، بہت سے ریڈیو ٹرانسمیٹرز اپنی مدت پوری کر چکے تھے، ہم نئے ٹرانسمیٹرز اور یونٹ لگا رہے ہیں جن سے 33 فیصد بجلی کی بچت ہوگی۔

مریم اورنگزیب نے کہاکہ ریڈیو پاکستان کے ڈیجیٹل منڈال کا آغاز ہونے کے بعد ایک ہزار کلو واٹ ڈی آر ایم کے ذریعے پاکستان کا بیانیہ 52 سے زائد ممالک میں پہنچ سکے گا۔ اس سے نوجوانوں کو روزگار کے مواقع بھی میسر آئیں گے، کیونکہ یہ ریڈیو پاکستان کو جدید ٹیکنالوجی سے آراستہ کرنے کی جانب ایک بڑا قدم ہے۔

وزیر اطلاعات نے کہاکہ ریڈیو پاکستان اور پی ٹی وی ہمارا اثاثہ ہیں، ہمیں اس کا تحفظ کرنا ہے، ہم نے اپنا تمام آرکائیو ڈیجیٹلائز کر لیا ہے، 9 مئی کو کچھ انتہا پسند عناصر نے ملک کے اثاثے کو نقصان پہنچانے کی کوشش کی تھی اور قومی آرکائیو کو مٹانے کی سازش کی گئی جس میں ناکام ہوئے۔

انہوں نے بتایا کہ  ریڈیو پاکستان کے 20 میں سے 14 یونٹ بند پڑے ہیں، انکو بھی جلد فعال بنائیں گے اور نئے یونٹس فراہم کریں گے، منصوبے پر آج سے آغاز کررہے ہیں جو 2 سال کے اندر مکمل کر لیا جائے گا۔