پاکستان تحریک انصاف (پی ٹی آئی) کی جانب سے منحرف رہنماؤں کو پارٹی سے نکالنے کا سلسلہ جاری ہے، سیکریٹری جنرل عمر ایوب کے دستخطوں سے جاری نوٹیفکیشن کے مطابق راجہ ریاض، نورعالم سمیت مزید 13 ارکان کو پارٹی سے نکال دیا گیا ہے۔
تحریک انصاف نے رمیش کمار وانکوانی، نزہت پٹھان، وجیہہ قمر، سردار ریاض محمود خان مزاری کو پارٹی سے نکال دیا۔ اس کے علاوہ رانا محمد قاسم نون کی بھی بنیادی رکنیت ختم کر دی گئی ہے۔
مزید پڑھیں
پی ٹی آئی نے نواب شیر، مخدوم زادہ سید باسط احمد سلطان، افضل خان ڈھانڈلہ، محمد عبدالغفار وٹو، عامر طلال گوپانگ اور احمد حسین دہر کو بھی پارٹی سے نکال دیا۔
پارٹی چھوڑنے والوں کو برطرفی کے نوٹس جاری کرتے ہوئے کہا گیا ہے کہ اب کسی بھی طرح سے پی ٹی آئی کا نام اور عہدہ استعمال کرنے سے گریز کیا جائے۔
پی ٹی آئی کے سیکریٹری جنرل عمر ایوب نے پارٹی پالیسی کی خلاف ورزی پر سابق ایم پی اے ملک شوکت کو بھی شوکاز نوٹس جاری کر دیا۔
شوکت علی کو مجاز اتھارٹی کے علم میں لائے بغیر نئی پارٹی کے اجلاس میں شرکت پر شوکاز نوٹس جاری کیا گیا ہے اور ان سے 2 روز میں وضاحت طلب کی گئی ہے۔
واضح رہے کہ پی ٹی آئی نے یکم اگست کو بھی کارروائی کرتے ہوئے سابق وزیراعلیٰ پنجاب عثمان بزدار سمیت 22 ارکان کی رکنیت معطل کر دی تھی۔
