پاکستان ٹیلی کمیونیکیشن کمپنی لمٹیڈ ( پی ٹی سی ایل ) نے ترکی اور شام میں حالیہ زلزلوں میں متاثر ہونے والے لاکھوں افراد کی مدد کے لئے پی ٹی سی ایل لینڈ لائن سے مفت کالز اور یوفون 4G سے مفت کالنگ منٹس کی سہولت فراہم کی ہے۔
پی ٹی سی ایل اور یوفون فور جی سے مفت بین الاقوامی کالز کی سہولت میسر ہوگی تاکہ لوگ ترکی اور شام میں اپنے دوستوں اور عزیزوں کی خیریت سے باخبر رہ سکیں ۔
یوفون 4G صارفین# *2255 ڈائل کرکے اس سہولت سے فائدہ اٹھا سکتے ہیں۔
پی ٹی سی ایل حکام کے مطابق پی ٹی سی ایل گروپ ترکی اور شام میں حالیہ زلزلوں سے ہونے والے انسانی جانوں کے ضیاع اور تباہی پر رنجیدہ ہے ۔
اس مشکل گھڑی میں پی ٹی سی ایل گروپ دونوں ممالک میں بے گھر ہونے والے لاکھوں افراد ،بشمول بچوں، خواتین اور بزرگوں کے ساتھ کھڑا ہے اور اس بات پر یقین رکھتا ہے کہ متاثرہ کمیونٹی کی مدد کرنا ہمارا فرض ہے۔
پی ٹی سی ایل اور یوفون 4G سمجھتے ہیں وسیع پیمانے پر ہونے والی اس تباہی سےدونوں ممالک میں بہت سے لوگوں کے دوست یا خاندان متاثر ہوئے ہونگے
اس لیے اپنے وسائل کو بروئے کار لاتے ہوئے انہیں اپنے پیاروں سے رابطے میں مدد دینا چاہتے ہیں۔
حکام کے مطابق پی ٹی سی ایل گروپ کو اپنی پاکستانی شناخت پر فخر ہے۔ مشکل میں پھنسے ہوئے لوگوں تک مدد پہنچانا قومی ذمہ داری ہے۔
یہ کوششیں ہنگامی صورتحال اور امن میں سماجی فلاح و بہبود کو فروغ دینے کے گروپ کے عزم کے مطابق ہیں ۔
