سابق ٹیسٹ کرکٹر سرفراز نواز نے پاکستان کرکٹ بورڈ کی مینجمنٹ کمیٹی کے سربراہ ذکا اشرف سے نیشنل کرکٹ اکیڈمی لاہور میں ملاقات کی ہے، جس میں ان ادائیگیوں پر بات چیت کی گئی جو جنوری 2017 ء سے پی سی بی کی جانب سے سرفراز نواز کو نہیں کی گئی تھیں۔
خوشگوار ماحول میں اس ملاقات میں سابق کپتان مصباح الحق اور محمد حفیظ بھی موجود تھے۔
پاکستان کرکٹ بورڈ کی منیجمنٹ کمیٹی کے سربراہ ذکا اشرف نے اس موقع پر سرفراز نواز کو پاکستان کرکٹ بورڈ کی کرکٹرز ویلفیئر پالیسی کے تحت ان کی تمام رکی ہوئی ادائیگیوں کا چیک حوالے کیا اور انہیں اپنی تمام تر حمایت کا یقین بھی دلایا۔
واضح رہے کہ یہ وہ ادائیگیاں تھیں جو سرفراز نواز کی جانب سے پلیئرز ویلفیئر پالیسی کے ضابطہ اخلاق کی خلاف ورزی کے باعث تادیبی کارروائی کے تحت روک دی گئی تھیں ۔
سرفراز نواز نے چونکہ اب پاکستان کرکٹ بورڈ کو یقین دلایا ہے کہ وہ ضابطہ اخلاق پر عمل کریں گے لہذا پلیئرز ویلفیئر پالیسی کے تحت وہ ادائیگیاں بحال کردی گئی ہیں ۔
اس موقع پر ذکا اشرف کا کہنا تھا کہ انہیں سرفراز نواز جیسے کرکٹر کو اس حالت میں دیکھ کر افسوس ہوا۔ وہ یہ دیکھ کر بہت مضطرب ہوئے کہ سرفراز نواز جیسے کرکٹر کو ان کی پینشن جیسے حق سے محروم رکھا گیا۔
ذکا اشرف کا کہنا تھا کہ سرفراز نواز نے جس صورتحال کا سامنا کیا اس طرح کسی بھی کرکٹر نے نہیں کیا ہوگا۔ یہ بات انتہائی مایوس کن ہے کہ پاکستان کرکٹ بورڈ کی سابقہ انتظامیہ نے پی سی بی کے خزانے کو ذاتی انتقام کے طور پر استعمال کیا۔
ذکا اشرف نے تمام سابق اور موجودہ کرکٹرز کو یقین دلایا کہ وہ چاہے ڈومیسٹک کرکٹرز ہوں یا انٹرنیشنل کھلاڑی، پاکستان کرکٹ بورڈ ان تمام کرکٹرز کو اپنا اثاثہ سمجھتا ہے اور بورڈ ہر قدم پر ان کا خیال رکھے گا۔تمام کھلاڑی پیار اور کرکٹ بورڈ کی جانب سے عزت و احترام کے مستحق ہیں۔
یاد رہے کہ سرفراز نواز نے 55 ٹیسٹ اور45 ون ڈے انٹرنیشنل میچوں میں پاکستان کی نمائندگی کی اور بالترتیب 177 اور63 وکٹیں حاصل کی تھیں۔
سرفراز نواز کا آسٹریلیا کے خلاف مارچ 1979 کے میلبرن ٹیسٹ کا یادگار اسپیل کوئی بھی نہیں بھول سکتا جب انہوں نے 33 گیندوں کے اسپیل میں صرف ایک رن کے عوض 7 وکٹیں حاصل کی تھیں ۔
اس اننگز میں انہوں نے 86 رنز دے کر9 وکٹیں حاصل کی تھیں اور پاکستان کو یادگار فتح سے ہمکنار کیا تھا جو آسٹریلیا میں حاصل کردہ چار ٹیسٹ کامیابیوں میں سے ایک ہے۔
