پاکستان کا جشن آزادی قریب آنے پر جہاں ملک بھر میں اس دن کی مناسبت سے تیاریاں جاری ہیں وہیں دنیا بھر کے سفارتخانوں میں بھی اس حوالے سے انتظامات کیے جا رہے ہیں، جبکہ اوورسیز پاکستانی بھی جشن آزادی پاکستان منانے کے لیے پُرعزم ہیں۔
پاکستان کے جشن آزادی کو برادر ملک متحدہ عرب امارات میں شایان شان انداز میں منارہا ہے۔ کراچی میں یواے ای کے قونصل خانے میں خصوصی تقریب کا اہتمام کیا گیا جس میں اسپیشل اولمپکس میں کامیابی کے جھنڈے گاڑنے والے اسپیشل اسٹار شریک ہوئے اور اماراتی قونصل جنرل کے ساتھ مل کر یوم آزادی کی خوشی منائی۔
پاکستان کے یوم آزادی کی مناسبت سے کراچی میں متحدہ عرب امارات کے قونصل خانے کو رنگ برنگے غباروں سے سجایا گیا اورملی نغمے گونج رہے تھے۔
تقریب سے خطاب کرتے ہوئے متحدہ عرب امارات کے قونصل جنرل کا کہنا تھا کہ پاکستان کے یوم آزادی کو اسپیشل بچوں کے ساتھ منانے کا مقصد ان کی حوصلہ افزائی کرنا ہے۔
قونصل خانے کی جانب سے ایتھلیٹس میں بیجز، چوڑیاں، کیپس اور دیگر تحائف تقسیم کیے گئے۔
خصوصی بچوں کے لیے فیس پینٹگ کا بھی انتظام کیا گیا تھا، بچوں نے اماراتی قونصل جنرل کے ساتھ تصاویر بھی بنوائیں۔
