’پاکستان چھوڑنے سے پہلے یاد رکھنا کہ کسی اور ملک میں سبزی کے ساتھ دھنیا اور مرچیں فری نہیں ملتیں‘

اگست کا مہینہ شروع ہوتے ہی جہاں ملک بھر میں جشن آزادی کی تیاریاں اپنے عروج پرہوتی ہیں۔ سبز ہلالی پرچم اور مختلف بینرز ہر جگہ لہراتے دکھائی دیتے ہیں، وہیں سوشل میڈیا پرایک بل بورڈ کی تصویر گردش کر رہی ہے جس میں لکھا گیا ہے کہ پاکستان چھوڑنے سے پہلے یہ یاد رکھنا یہ وطن تمہارا ہے، تم ہو پاسباں اس کے۔

 بل بورڈ پر لکھا گیا نغمہ سوشل میڈیا پر زِیر بحث آیا تو صارفین نے اس پر دلچسپ تبصرے کیے۔

ماریہ انجم لکھتی ہیں کہ باقی سب تو ٹھیک ہے لیکن امریکا میں بیٹھ کر یہ نغمہ سننے کا مزہ ہی الگ ہو گا۔

ہاں ٹھیک ہے لیکن امریکا میں بیٹھ کے یہ نغمہ سننے کا مزہ ہی الگ ہوگا۔ pic.twitter.com/ToDcR5liOh

— Maria Anjum (@MariaAnjum11) August 9, 2023

اسلام آبادیز نامی پیج نے مزاح کا سہارا لیتے ہوئے کہا پاکستان چھوڑنے سے پہلے یہ یاد رکھنا کہ کسی اور ملک میں سبزی کے ساتھ دھنیا اور مرچیں فری نہیں ملتیں۔

پاکستان چھوڑنے سے پہلے یاد رکھنا کہ کسی اور ملک میں سبزی کے ساتھ دھنیا اور مرچیں فری نہیں ملتی! 😐 pic.twitter.com/12fdTdDU9g

— Islamabadies (@Islamabadies) August 10, 2023

ایک صارف نے تبصر کرتے ہوئے کہا کہ یہ وطن تمہارا ہے، عوام خوامخواہ ہے اس میں۔

یہ وطن تمہارا ہے

عوام ہے خوامخواہ اس میں 😉 pic.twitter.com/oM4pQ56j1e

— 🍁 Riffat Wani 🍁 (@RiffatWrites) August 9, 2023

سماجی رابطوں کی سائیٹ فیس بک پر ینگ پاکستان نامی پیج نے لکھا کہ اب نوبت یہاں تک آ گئی ہے کہ پاکستان نہ چھوڑے جانے کے لیے بینرز لگائے جا رہے ہیں۔

عامر ملک نے لکھا کہ وطن کے پاسبانوں کو بل بورڈ پر درج سطروں کو خود پر لاگو کرنے کی زیادہ ضرورت ہے۔

طنزو مزاح کا سہارا لیتے ایک صارف نے لکھا کہ اگر دنیا پاکستان کے لیے ویزہ کھول دے تو پاکستان دو دن میں ہی خالی ہو جائے گا۔

واضح رہے کہ روزگار اور بہتر مستقبل کے لیے بیرون ملک جانے والے پاکستانیوں کی تعداد میں خاطر خواہ اضافہ دیکھنے میں آرہا ہے۔