اسلام آباد ہائی کورٹ نے چیئرمین تحریک انصاف عمران خان کے خلاف توشہ خانہ کیس کا مکمل ریکارڈ طلب کرتے ہوئے فریقین کو سزا کے خلاف اپیل کو جلد سماعت کے لیے مقرر کرنے پر بھی نوٹس جاری کردیے ہیں۔
چیئرمین پی ٹی آئی کی توشہ خانہ کیس میں سزا کے خلاف اپیل پر سماعت کا تحریری حکم نامہ اسلام آباد ہائی کورٹ کے چیف جسٹس عامر فاروق اور جسٹس طارق محمود جہانگیری نے جاری کیا۔ عدالت نے فریقین کو سزا کے خلاف اپیل اور سزا معطلی کی درخواست پر نوٹس جاری کیے ہیں۔
عدالتی حکمنامے کے مطابق چیئرمین پی ٹی آئی کی اپیل ٹرائل کورٹ کے 5 اگست کے فیصلے کیخلاف ہے، جہاں سابق وزیر اعظم عمران خان کیخلاف الیکشن کمیشن کی شکایت پر مقدمہ کے سماعت کے بعد انہیں 3 سال قید اور ایک لاکھ روپے جرمانے کی سزا سنائی گئی تھی۔
اسلام آباد ہائیکورٹ نے فریقین کو نوٹس جاری کرنے کا حکم دیتے ہوئے سابق وزیر اعظم عمران خان کیخلاف توشہ خانہ کیس کا تمام متعلقہ ریکارڈ طلب کرلیا ہے۔ عدالت نے چیئرمین پی ٹی آئی کی سزا معطلی کی درخواست جلد مقرر کرنے کی ہدایت بھی کی ہے۔
واضح رہے کہ سابق وزیر اعظم اور چیئرمین پی ٹی آئی نے اسلام آباد کی ڈسٹرکٹ اینڈ سیشن کورٹ کی جانب سے توشہ خانہ کیس میں سنائی گئی سزا معطل کرکے ضمانت پر رہائی کی درخواست اسلام آباد ہائیکورٹ میں دائر کر رکھی ہے۔
