کراچی کی انسداد دہشتگردی عدالت نے محکمہ داخلہ کی جانب سے مقدمہ واپس لینے کی درخواست منظور کرتے ہوئے مبینہ دہشت گردوں کو علاج معالجے کی سہولت فراہم کرنے کے الزام میں نامزد تمام ملزمان کو بری کرنے کا حکم دیا ہے۔
محکمہ داخلہ کی جانب سے مقدمہ واپس لینے کی درخواست پر انسداد دہشتگردی کی عدالت نے محفوظ فیصلہ سنا دیا۔ عدالت نے محکمہ داخلہ کی مقدمہ واپس لینے کی درخواست منظور کرتے ہوئے مقدمہ میں نامزد پیپلز پارٹی اور ایم کیو ایم کے رہنماؤں کو بری کرنے کا حکم دیا ہے۔
صوبائی محکمہ داخلہ نے ضابطہ فوجداری کی دفعہ 497 کے تحت مقدمہ واپس لینے کی درخواست کرتے ہوئے موقف اپنایا تھا کہ ملزمان کے خلاف شواہد موجود نہیں ہیں لہذا مقدمہ ختم کیا جائے۔ تفتیشی افسر نے بھی مقدمہ اے کلاس کرنے کی سفارش کی تھی۔
مقدمے میں پی پی رہنما ڈاکٹر عاصم حسین اور قادر پٹیل شامل سمیت ایم کیو ایم کے انیس قائم خانی، رؤف صدیقی اور وسیم اختر شامل تھے۔ پاسبان کے رہنما عثمان معظم بھی ایک نامزد ملزم تھے۔