لاہور ہائیکورٹ نے بغیر ہیلمٹ پیٹرول کی فروخت پر پابندی کا حکم معطل کرنے کے فیصلے کا تحریری حکمنامہ جاری کر دیا۔ عدالت نے آئندہ سماعت تک بغیر ہیلمٹ پیٹرول کی فراہمی پر پابندی کا نوٹیفکیشن معطل کر دیا۔
لاہور ہائیکورٹ کے جج جسٹس راحیل کامران شیخ نے شہری عرفان بشیر کی درخواست پر عبوری تحریری حکم جاری کیا۔
درخواست گزار کے مطابق ہیلمٹ کے بغیر پیٹرول کی فراہمی پر پابندی کا نوٹیفکیشن غیر قانونی ہے اور درخواست گزار نے دلائل کے حق میں اعلیٰ عدلیہ کے فیصلے بھی پیش کیے۔
عدالت نے ڈپٹی کمشنر سمیت دیگر فریقین کو آئندہ سماعت پر تفصیلی جواب جمع کرانے کی ہدایت کر دی اور درخواست پر مزید کارروائی 16 اگست تک ملتوی کردی۔
واضح رہے کہ عدالت نے 11 اگست کو بغیر ہیلمٹ پیٹرول کی فروخت پر پابندی کا فیصلہ معطل کرتے ہوئے مختصر فیصلہ سنایا تھا۔