لاہور فیکٹری ایریا میں شوہر نے امریکی نژاد بیوی کو قتل کر دیا، لاش دفنانے کے لیے قبرستان لے جانے پر گرفتار کر لیا گیا، جہاں پر ملزم کے قبضے سے آلہ قتل بھی برآمد کر لیا گیا۔
پولیس کے مطابق فیکٹری ایریا کے رہائشی شوہر نے اپنی امریکن نیشنل اہلیہ کو تشدد کرکے قتل کیا، اور واردات کو چھپانے کے لیے اکیلے ہی لاش اٹھا کر قبرستان پہنچ گیا تاکہ گرفتاری سے بچا جاسکے، تاہم پولیس نے بروقت کارروائی کرتے ہوئے ملزم کو گرفتار کرلیا۔
پولیس حکام نے بتایا کہ لاہور کے فیکٹری ایریا میں کاظم خان نامی ملزم نے اپنی اہلیہ ڈائینا کرسٹوخان پر بدترین تشدد کیا جس سے وہ ہلاک ہوگئی، اور جرم چھپانے کے لیے لاش کو دفنانے قبرستان لے گیا۔
ایس پی کینٹ اویس شفیق کے مطابق پولیس نے بروقت کارروائی کرتے ہوئے ملزم کاظم کو گرفتار کیا اور خاتون کی لاش پوسٹ مارٹم کے لیے مردہ خانے منتقل کردی جبکہ واردات کا مقدمہ درج کر کے ملزم سے تحقیقات کی جا رہی ہیں۔