نگراں وزیراعظم انوارالحق کاکڑ سے سعودی اور امارات کے سفرا نے بدھ کو ملاقات کرکےانہیں عہدہ سنبھالنے پر مبارکباد پیش کی اور اپنی حکومتوں وعوام کی جانب سے نیک خواہشات کا اظہار کیا۔
سعودی عرب کے سفیر نواف بن سعید احمد المالکی نےنگراں وزیراعظم انوار الحق کاکڑ سے ملاقات کے دوران انہیں عہدہ سنبھالنے پر مبارکباد دیتے ہوئے خادم حرمین شریفین، ولی عہد شہزادہ محمد بن سلمان اور سعودی عرب کے عوام کی جانب سے نیک خواہشات کا اظہار کیا۔
اس موقع پر نگراں وزیراعظم انوار الحق کاکڑ نے پاکستان کے معاشی استحکام اور ترقی کے لیے سعودی حکومت کی مسلسل حمایت پر شکریہ ادا کرتے ہوئے کہا کہ خصوصی سرمایہ کاری سہولت کونسل بالخصوص سعودی عرب سے غیر ملکی سرمایہ کاری کو تیز تر کرنے کی بنیاد رکھے گی۔
نگراں وزیراعظم انوار الحق کاکڑ نے کہا کہ پاکستان اور سعودی عرب کے درمیان تاریخی اور گہرے تعلقات ہیں۔ انہوں نے پاکستان کے معاشی استحکام اور ترقی کے لیے سعودی حکومت کی مسلسل حمایت پر شکریہ ادا کیا۔
مزید پڑھیں
انہوں نے خاص طور پر سعودی عرب میں کام کرنے والے پاکستانیوں کی بڑی تعداد کا ذکر کیا اور سعودی حکومت سے درخواست کی کہ انہیں ہر ممکن سہولیات فراہم کی جائیں۔
وزیراعظم نے سعودی قیادت کے ویژن کو سراہتے ہوئے کہا کہ سعودی عرب ہمیشہ پاکستان کو اپنے قابل اعتماد شراکت دار کے طور پر شمار کر سکتا ہے۔
وزیراعظم نے اس بات پر زور دیا کہ حال ہی میں قائم کی گئی خصوصی سرمایہ کاری سہولت کونسل (ایس آئی ایف سی ) پہلے کی طرح کام کرتی رہے گی اور بالخصوص سعودی عرب سے غیر ملکی سرمایہ کاری کو تیز تر کرنے کی بنیاد رکھے گی۔
’اس سلسلے میں انہوں نے توانائی، انفراسٹرکچر، زراعت، آئی ٹی اور افرادی قوت کو تعاون کے ممکنہ شعبوں کے طور پر اجاگر کیا‘۔
سعودی سفیر نے اس بات کا اعادہ کیا کہ سعودی عرب اور پاکستان ایک برادرانہ رشتے میں بندھے ہوئے ہیں جس کی خصوصیت باہمی اعتماد، افہام و تفہیم اور مشترکہ مفاد کے تمام دوطرفہ اور علاقائی امور پر قریبی تعاون ہے۔
خواہش ہے کہ یو اے ای حکومت اپنے ملک میں مقیم پاکستانیوں کی حمایت جاری رکھے، وزیراعظم
پاکستان میں متحدہ عرب امارات کے سفیر جناب حماد عبید ابراہیم سالم الزابی نے بھی بدھ کو نگراں وزیراعظم انوار الحق کاکڑ سے ملاقات کی اور انہیں عہدہ سنبھالنے پر اپنے ملک کی قیادت کی جانب سے مبارکباد دی۔
نگراں وزیراعظم نے پرتپاک مبارکباد کے پیغامات پر متحدہ عرب امارات کی حکومت کا شکریہ ادا کیا اور کہا کہ پاکستان اور متحدہ عرب امارات کے درمیان تاریخی اور گہرے برادرانہ تعلقات ہیں۔ انہوں نے پاکستان کے معاشی اور مالی استحکام کے لیے متحدہ عرب امارات کی حمایت پر بھی شکریہ ادا کیا۔
انوار الحق کاکڑ نے کہا کہ وہ متحدہ عرب امارات کے ساتھ مختلف شعبوں بالخصوص تجارت، سرمایہ کاری اور توانائی میں دونوں ممالک کے باہمی تعاون کو مزید آگے بڑھتا دیکھنے کے منتظر ہیں۔ انہوں نے اس سال کے آخر میں کوپ 28 کانفرنس کی میزبانی میں متحدہ عرب امارات کی کامیابی کی خواہش کی ظاہر کی۔
انہوں نے متحدہ عرب امارات میں مقیم پاکستانیوں کے اہم کردار پر بھی زور دیا اور متحدہ عرب امارات کی حکومت سے ان کے لیے حمایت جاری رکھنے کی خواہش کی۔
