انصاف لائرز فورم نے پاکستان تحریک انصاف (پی ٹی آئی ) کے چیئرمین عمران خان کے بھانجے حسان نیازی کی گرفتاری اور انہیں حبسِ بیجا میں رکھنے کا الزام عائد کرتے ہوئے حکومتِ بلوچستان کے خلاف ہائیکورٹ میں درخواست دائر کردی ہے۔سماعت جمعہ کو ہو گی۔
’انصاف لائیرز فورم کی جانب سے دائر کردہ درخواست میں محکمہ داخلہ بلوچستان، انسپکٹر جنرل (آئی جی ) پولیس، سینیئر سپرینڈنٹ پولیس (ایس ایس پی) آپریشنز کوئٹہ اور اسٹیشن ہاؤس آفیسر( ایس ایج او) بجلی روڈ پولیس اسٹیشن کو فریق بنایا گیا ہے۔
انصاف لائرز فورم نے درخواست میں مؤقف اختیار کیا ہے کہ ’میڈیا رپورٹس کے مطابق حسان نیازی کو ایبٹ آباد پولیس نے کوئٹہ پولیس کے حوالے کیا ہے جب کہ حسان نیازی کو 2 روز گزر جانے کے باوجود متعلقہ مجسٹریٹ کے سامنے پیش نہیں کیا گیا۔
درخواست میں کہا گیا ہے کہ حسان نیازی کو کوئٹہ پولیس کے حوالے کرتے ہوئے قواعد و ضوابط پر عمل نہیں کیا گیا، حسان نیازی کو منظر عام پر لایا جائے۔آئینی درخواست پر سماعت جمعہ کو ہوگی۔