20 اگست کو اسسٹنٹ کمشنر کراچی عابد قمر شیخ نے کمشنر کراچی محمد اقبال میمن کی جانب سے ایک نوٹیفیکشن جاری کیا جس میں سعودی وزیر حج کے فقید المثال استقبال کے لیےسرکاری اسکولوں کے 5 ہزارطالبعلموں کو 22 اگست یعنی آج بروز منگل صبح 10 بجے گورنر ہاؤس پہنچانے کا حکم دیا گیا تھا۔
کمشنر آفس سے جاری حکم نامے میں تمام ڈپٹی کمشنرز کوپابند کیا گیا ہے کہ 5ہزار بچوں کی موجودگی گورنر ہاؤس اور اس کے اطراف میں یقینی بنائی جائے۔
اس نوٹیفیکشن پر عملدرآمد کے بعد آج کراچی کے ریڈ زون میں شدید ٹریفک جام ہے گورنرہاؤس، فوارہ چوک، آرٹس کونسل چوک، کراچی پریس کلب چوک اور شاہین کمپلیکس کےاطراف گاڑیوں کی قطاریں لگ چکی ہیں۔
ٹریفک پولیس کے مطابق اسکول کے بچے گورنر ہاؤس میں منعقدہ تقریب میں شرکت کے لیے آئے ہیں، اسکول کےبچوں کی گاڑیاں سڑک پر کھڑی ہونے سےٹریفک کی روانی متاثر ہوئی ہے، جسے کنٹرول کرنے میں دشواری کا سامنا ہے۔
