ڈسٹرکٹ سٹی پولیس کراچی اور حساس ادارے نے مشترکہ کارروائی کر کے بھارتی جاسوس اور اس کے سہولت کار کو گرفتار کر لیا۔
ایس ایس پی سٹی کراچی عارف عزیز کے مطابق بدھ کے روز ڈسٹرکٹ سٹی پولیس اور حساس ادارے نے مشترکہ کارروائی کرتے ہوئے پاکستان میں جاسوسی میں ملوث ایک بھارتی شہری اور اس کے پاکستانی سہولت کار کو گرفتار کیا۔
ملزمان کے قبضے سے 2 انڈین پاسپورٹ، 1 پستول بمعہ راؤنڈز، 5 لاکھ ایرانی ریال، جعلی جیولری 6 موبائل فونز، 1 ٹیبلٹ اور دیگر کاغذات برآمد ہوئے ہیں۔
ملزمان کی شناخت اکھل دیو ولد مدھو سدھاناں جالیکھا اور ظہور احمد ولد امام بخش کے ناموں سے ہوئی ہے۔
پولیس کے مطابق ملزمان کو کراچی کے علاقے تھانہ کلاکوٹ کی حدود سے گرفتار کیا گیا، ملزم اکھل دیو انڈین جاسوس ہے جو پاکستان کے مختلف اہم اور حساس مقامات کی جاسوسی کر رہا تھا۔
ایس ایس پی سٹی کراچی ملزمان کو گرفتار کر کے مزید تحقیقات کی جا رہی ہیں اور ملزمان کے ساتھیوں کی گرفتاری کے لیے چھاپے مارے جا رہے ہیں، تحقیقات کے دوران ملزمان سے بڑے انکشافات کی توقع ہے۔
