نگراں وزیراعظم انوارالحق کاکڑ نے متعلقہ حکام کو ہدایت کی ہے کہ خصوصی سرمایہ کاری سہولت کونسل (ایس آئی ایف سی) کے سرمایہ کاری سے متعلق پیدا کیے گئے سازگار ماحول سے فائدہ اٹھاتے ہوئے اس کے نشاندہی شدہ منصوبوں کی تکمیل میں تیزی لائی جائے۔
خصوصی سرمایہ کاری سہولت کونسل (ایس آئی ایف سی) کی اپیکس کمیٹی کا اجلاس اسلام آباد میں منعقد ہوا۔ نگراں حکومت کے زیراہتمام خصوصی سرمایہ کاری سہولت کونسل کا یہ پہلا اجلاس تھا۔
نگراں وزیراعظم انوارالحق کی زیر صدارت ’ایس آئی ایف سی‘ کی اپیکس کمیٹی کے اجلاس میں چیف آف آرمی سٹاف، پوری وفاقی کابینہ، وزرائے اعلیٰ، صوبائی وزرا اور اعلیٰ سرکاری حکام نے شرکت کی۔
کابینہ کو ’ایس آئی ایف سی‘ کے اقدامات کا تفصیلی جائزہ پیش کیا گیا جس میں اہم شعبوں میں پیش رفت اور کم وقت میں اب تک حاصل کردہ بینچ مارکس شامل ہیں۔
وزیر اعظم نے ’مکمل حکومتی نقطہ نظر‘ کے تحت ہر سطح پر ہم آہنگی پیدا کرنے کے لیے ’ایس آئی ایف سی‘ کے مؤثر کام کی تعریف کی۔ اپیکس کمیٹی نے سعودی عرب اور اسلامک آرگنائزیشن فار فوڈ سیکیورٹی (آئی او ایف ایس) کے اعلیٰ سطحی وفود کے نتیجہ خیز دوروں سمیت برادر اور دوست ممالک کے ساتھ جاری روابط کو عالمی سطح پر پذیرائی دلانے کے لیے ایس آئی ایف سی کی حکمت عملی کو بھی سراہا۔
اپیکس کمیٹی نے ’ایس آئی ایف سی‘ کے اقدامات پر اعتماد کا اظہار کیا اور ملکی معیشت کی بحالی کے لیے مثبت سمت میں آگے بڑھنے کے لیے اپنے عزم اور حمایت کا اظہار کیا۔ ایپکس کمیٹی نے زراعت، لائیو سٹاک، کان کنی، معدنیات، آئی ٹی اور توانائی کے اہم شعبوں میں سرمایہ کاری کو راغب کرنے کے لیے پچھلی حکومت کی طرف سے منظور کردہ منصوبوں کی بھی توثیق کی۔
آخر میں وزیراعظم نے ہدایت کی کہ ایس آئی ایف سی کے ذریعے پہلے سے پیدا شدہ سازگار ماحول سے فائدہ اٹھاتے ہوئے نشاندہی شدہ منصوبوں کی تکمیل میں تیزی لائی جائے۔
آرمی چیف نے ملکی معیشت کی بحالی اور پاکستان کو ترقی و خوشحالی کی راہ پر گامزن کرنے کے لیے پالیسیوں کے تسلسل کے لیے نگران حکومت کی ہر ممکن حمایت کا اعادہ کیا۔
