راولپنڈی میں ڈکیتوں کے ہاتھوں تشدد کا نشانہ بننے اور قیمتی اشیا سے محروم ہونے والی خاتون معلمہ کو اس کا قیمتی سامان پہنچا دیا گیا، پنجاب پولیس نے ڈاکو کی گرفتاری کے بعد چھینی گئی اشیا 2 روز کے اندر برآمد کر کے خاتون کو گھر جا کر حوالے کیں۔
شاباش پنجاب پولیس
کل پرسوں دوران ڈکیتی جس خاتون پر تشدد ہوا اور وڈیو وائرل تھی پولیس نے نہ صرف ڈاکو گرفتار کر لیے بلکہ مال مسروقہ بھی برامد کر لیا۔
اگر مذمت کی گئی ہے تو شاباش نہ دینا بھی جرم ہے۔@OfficialDPRPP pic.twitter.com/d1VVZ3AtNZ— Shah Owais Noorani (@iamowaisnoorani) August 30, 2023
واضح رہے کہ پیر 28 اگست کو راولپنڈی کے علاقے تھانہ وارث خان کی حدود میں ڈکیتی کی واردات کے دوران 2 موٹرسائیکل سوار ملزمان اسلحہ کے زور پر خاتون سے پرس اور موبائل چھین کر فرار ہو گئے تھے، جبکہ خاتون کو زدوکوب بھی کیا گیا تھا۔
یہ بھی پڑھیں راولپنڈی میں باپردہ خاتون سے ڈکیتی کی لرزہ خیز واردات
واقعے کی ویڈیو سوشل میڈیا پر وائرل ہونے کے بعد پولیس نے نامعلوم افراد کے خلاف مقدمہ درج کر کے ملزمان کی گرفتاری کے لیے پولیس کی ٹیم تشکیل دی تھی۔
آج صبح خاتون کو لوٹنے میں ملوث ڈاکوؤں کا پولیس کے ساتھ آمنا سامنا ہو گیا جہاں ملزمان نے پولیس کی ٹیم پر فائرنگ کردی، پولیس کی جوابی فائرنگ میں ایک ڈاکو زخمی ہو گیا جس کو گرفتار کر لیا گیا، گرفتار ڈاکو کا نام حمزہ ہے جس کے قبضے سے موقع پر ایک پستول اور موٹر سائیکل برآمد ہوا تھا۔
یہ بھی پڑھیں راولپنڈی: خاتون ٹیچر پر تشدد اور ڈکیتی کاملزم گرفتار
ملزم کی گرفتاری کے بعد سی پی او راولپنڈی سید خالد ہمدانی کی ہدایت پر ایس پی رورل نے ڈکیتی اور تشدد کا شکار ہونے والی خاتون ٹیچر کے شوہر ظفر سے ان کے گھر پر جا کر ملاقات کی اور انہیں پولیس کی کارروائی سے آگاہ کیا تھا۔
اب ملزم کی نشاندہی پر خاتون سے چھینی گئی اشیا برآمد کر کے پولیس نے خاتون کو گھر جا کر حوالے کر دی ہیں، پولیس کے اس اقدام کو عوام کی جانب سے سراہا جا رہا ہے۔
سوشل میڈیا ٹائم لائنز پر پنجاب پولیس کی اس کارکردگی کی تعریف کی جا رہی ہے۔
