پاکستان مسلم لیگ ن کی چیف آرگنائزر مریم نواز نے کہا ہے کہ نواز شریف کے ہوتے ہوئے قوم کو مایوس ہونے کی ضرورت نہیں، قائد ن لیگ کی قیادت میں قوم کو مہنگائی سے نجات دلائیں گے، قوم آج سوال پوچھے کہ نوازشریف کو اقتدار سے الگ کر کے لوگوں کو مہنگائی کی سزا کیوں دی گئی۔
مسلم لیگ ن پنجاب ویمن ونگ کی عہدیداروں سے گفتگو کرتے ہوئے مریم نواز نے کہاکہ مہنگائی، بے روزگاری اور غربت سے عوام کی آنکھوں میں آنسو لانے والے مجرموں کو کٹہرے میں کھڑا کرنا ہوگا۔
انہوں نے کہاکہ مہنگائی سے نکلنے والے قوم کے آنسوﺅں کو خوش حالی کی ہواﺅں سے پونچھیں گے، پارٹی کے شعبہ خواتین نے سیاسی وجماعتی تاریخ میں ہمیشہ ناقابل فراموش کردار ادا کیا ہے۔
مزید پڑھیں
مریم نواز نے کہاکہ شعبہ خواتین نے ہر سیاسی معرکے میں بہادری، نظریاتی وابستگی اور جرات کا بے مثال مظاہرہ کیا، ہم نے خواتین اور نوجوانوں کو سیاست کا ہراول دستہ بنادیا ہے۔
چیف آرگنائزر ن لیگ نے کہاکہ قائد نوازشریف نے ہر دور حکومت میں خواتین اور نوجوانوں کو ترقی کے مواقع فراہم کیے۔2013 سے 2018 کا وزیراعظم نوازشریف کا دور کم ترین مہنگائی اور تیز ترین ترقی کا دور تھا۔
مہنگائی 4 سال کے پراجیکٹ عمران کی وجہ سے ہوئی
ان کا کہنا تھا کہ پاکستان سے غربت اور مہنگائی کے اندھیرے اسی طرح ختم کریں گے جس طرح لوڈ شیڈنگ ختم کی تھی۔
مریم نواز نے کہا کہ مہنگائی 4 سال کے پراجیکٹ عمران کی وجہ سے ہوئی، لاڈلے کی خاطر نوازشریف کو نااہل نہ کیاجاتا تو آج مہنگائی نہیں پاکستان میں خوش حالی ہوتی۔
اس موقع پر خواتین ونگ کی عہدیداروں نے خواتین کو نیا اعتماد اور نئے مواقع دینے پر مریم نوازشریف کا شکریہ ادا کیا۔ اور کہا کہ پارٹی اور قیادت کے اعتماد کو ٹھیس نہیں پہنچائی جائے گی۔
