اسلام آباد سمیت ملک کے بیشتر علاقوں کے عوام چند گھنٹوں بعد سپر بلیو مون کا نظارہ کر سکیں گے۔ بدھ و جمعرات کی شب چاند رواں ماہ میں دوسری بار زمین سے قریب تر ہو گا۔
ماہرین فلکیات کے مطابق دوسرا سپر مون پاکستان کے معیاری وقت کے مطابق جمعرات کی صبح 4 بجے دیکھا جاسکے گا۔
سپر بلیو مون کیا واقعی ’بلیو‘ ہوتا ہے؟
’سپر بلیو مون‘ کی اصطلاح سے کچھ لوگ یہ سمجھتے ہیں کہ شاید بلیو مون واقعی بلیو ہوتا ہے۔ جب کہ حقیقت میں ایسا نہیں ہے اسے ’سُپر بلیو مون‘ اس لئے کہا جاتا ہے کیونکہ یہ ایک ماہ میں دکھائی دینے والا دوسرا سُپر مون ہوتا ہے۔
اب سے کچھ چند گھنٹوں بعد دکھائی دینے والا سپر بلیو مون معمول سے 7.2 فیصد بڑا اور 15.7 فیصد زیادہ روشن نظر آئے گا۔
اس مہینے کا سپر بلیو مون اس لیے بھی خاص ہے کیونکہ اس کے بعد ایسا نظارہ دیکھنے کے لیے 2037 تک انتظار کرنا ہوگا۔
