پاکستان میں مسلسل بڑھتی مہنگائی نے گزشتہ چند روز کے دوران احتجاج کی شکل اختیار کی تو اس کے اثرات ملکی سرحدوں سے باہر بھی محسوس کیے جا رہے ہیں۔
بدھ اور جمعرات کو سوشل ٹائم لائنز پر ڈسکس ہونے والی مہنگائی کا ذکر اتنا بڑھا کہ یہ پڑوسی ملک بھارت کے ٹرینڈز پینل میں بھی نمایاں رہا۔
معاملے کے پس منظر سے مکمل طور پر واقفیت نہ رکھنے والے بھارتی صارف صارفین نے اپنی ٹائم لائن میں یہ ٹرینڈ دیکھا تو حیرت کا اظہار کیا۔
بھارتی تاجر رویندرا امبیکر نے اپنی ٹویٹ میں ہیش ٹیگ سجاتے ہوئے لکھا کہ ’پیٹرول ڈیزل پرائس بھارت میں ٹرینڈ کر رہا ہے۔ اس ٹرینڈ کے نیچے ہونے والی پوسٹس دیکھیں۔‘
انہوں نے مزید لکھا کہ ’یہ کون کر رہا ہے اور کس لیے۔‘
#PetrolDieselPrice trending in India. See posts under this trend. Who are doing this ? and for what ? pic.twitter.com/s5mDqLJ61s
— Ravindra Sangeeta Ashok Ambekar (@RavindraAmbekar) August 31, 2023
پاکستان میں رواں ماہ کے بجلی کے بل آنے کے بعد احتجاج کا سلسلہ اس وقت شروع ہوا جب آزاد کشمیر کے مکینوں نے اس کے خلاف آواز بلند کی۔
اس معاملے کے اگلے ہی روز کراچی میں تاجروں اور جماعت اسلامی نے احتجاج کیا اور ہوشربا بجلی کے بلوں کا مسئلہ فوری حل کرنے کا مطالبہ کیا۔
پاکستانیوں کا شکوہ ہے کہ مہنگی بجلی اور لوڈشیڈنگ الگ پریشانی تھی۔ اب بجلی کے بلوں میں درجن بھر یا اس سے بھی زائد ٹیکسوں نے پہلے سے معاشی بدحالی کا شکار افراد کی کمر توڑ دی ہے۔
عوام نے بجلی کے بلوں کی خاطر خودکشیاں اور خود سوزیاں شروع کر دیں۔
یہ ورسک روڈ پشاور کی ایک دکان کا بجلی بل ہے۔ اس میں 13 مختلف قسم کےٹیکسز لیے جا رہے ہیں۔ بجلی 18 ہزار کی خرچ ہوئی، 16 ہزار کے ٹیکس بل میں شامل کرکے بجلی کا بل34 ہزار آیا ہے اور اب قیمتوں میں حالیہ5 روپے 40 پیسے فی… pic.twitter.com/Zeg79E6SRk— Senator Mushtaq Ahmad Khan | سینیٹر مشتاق احمد خان (@SenatorMushtaq) August 25, 2023
ابتدائی احتجاج کے بعد سے روزانہ کی بنیاد پر پاکستان کے کسی نہ کسی علاقے میں احتجاجی مظاہروں، شٹر ڈاؤن ہڑتالوں اور دیگر ذرائع کے ساتھ ساتھ سوشل ٹائم لائنز پر بھی عوامی غم وغصہ نمایاں ہے۔
اسی دوران ملک کے مختلف شہروں سے خودسوزی، بل جلانے اور دیگر افسوسناک واقعات بھی رپورٹ کیے گئے ہیں۔
مہنگی بجلی کے خلاف آج پشاور میں تاجروں کی جانب سے ہڑتال کی جا رہی ہے۔
پشاور میں آج مہنگے بجلی بلوں کے خلاف کامیاب شٹر ڈاؤن ہڑتال
کل کراچی جبکہ پرسوں ملک بھر میں ہڑتال ہوگی میڈیا اس کو نہیں دکھا رہا آپکا کام ہے اسکو ہر جگہ پھیلا دیں pic.twitter.com/SXi4zoPO58
— Shams Khattak (@Sh_am_92) August 31, 2023
یہ پہلی مرتبہ نہیں کہ پشاور میں احتجاج ہوا ہو۔ گزشتہ ہفتے بھی یہاں کے مکینوں نے شاہین مسلم ٹاؤن میں بڑا احتجاج کیا تھا۔ اس دوران بجلی کے بلوں کو جلایا اور حکومت کے خلاف نعرے بازی کی گئی۔
بجلی کے بھاری بل
شاہین مسلم ٹائون پشاور کے رہائشیوں نے بجلی بل جلا دئے pic.twitter.com/3x7hJlOetM— Muhammad Faheem (@MeFaheem) August 25, 2023
ملک میں مسلسل بڑھتی مہنگائی اور حکومتی سطح پر اس کا ازالہ نہ ہونے کے خلاف جماعت اسلامی کی جانب سے ہفتہ 2 ستمبر کو ملک گیر ہڑتال کی کال دی گئی ہے۔
جماعت اسلامی بجلی بلوں میں اضافہ کے خلاف سپریم کورٹ سے رجوع کرے گی۔ بجلی کے بل گھروں میں موت کے پروانے بن کر آتے ہیں۔ ادائیگی کے لیے مائیں، بہنیں زیورات بیچنے پر مجبور ہیں اس ظلم کے خلاف 2 ستمبر کو #ملک_گیرعوامی_ہڑتال ہوگی، مکمل شٹرڈاؤن ہوگا۔ مہنگائی اور بجلی کے بلوں سے تنگ عوام…
— Siraj ul Haq (@SirajOfficial) August 30, 2023
پاکستان میں سرکاری افسران کو مفت بجلی کی فراہمی، بجلی چوری سمیت دیگر لائن لاسز، اشرافیہ کو تقریبا 1.7 ارب ڈالر کی مراعات، سستی بجلی پیدا کرنے کے منصوبوں کا فعال نہ ہونا توانائی کے شعبے میں مہنگائی کی بڑی وجہ قرار دیا جاتا ہے۔
سرکاری ادارے نیپرا کی رپورٹ کے مطابق ملک میں سب سے زیادہ بجلی چوری پشاور، سکھر، حیدرآباد، کوئٹہ، ملتان اور لاہور میں ہوتی ہے۔
پاکستان میں بجلی چوری کے ٹاپ ریجنز:-
1- پشاور 37.47 % بجلی چوری
2- سکھر 35.27 %
3- حیدرآباد 32.88 %
4- کوئٹہ 28.92 %
5- ملتان 14.93 %
6- لاہور 11.52 %
ان ڈسکوز کے کرتا دھرتا چوری میں برابر کے شریک ہیں اور ایمانداری سے بل ادا کرنے والوں پر اپنی چوری کا بوجھ منتقل کر رہے ہیں- pic.twitter.com/3myvmWA1Gu— Amir H. Qureshi (@AmirHQureshi) August 31, 2023
ان سرکاری اعدادوشمار کا حوالہ دے کر پاکستانیوں کی اکثریت یہ مانتی ہے کہ لائن لاسز یا بجلی چوری کے یہ معاملات سرکاری عملے کی ملی بھگت سے ہوتی ہے۔
مہنگی بجلی اور پیٹرول کے خلاف احتجاج کا معاملہ ایک ایسے وقت میں شدت اختیار کر رہا ہے جب چند ہفتوں کے دوران چینی کی فی کلو قیمت میں 70 روپے، پیٹرول کی فی لٹر قیمت میں 40 روپے اور ادویات کی قیمتوں میں 40 فیصد اضافہ کیا گیا ہے۔
