ڈیرہ اسماعیل خان میں نامعلوم شخص کی فائرنگ سے میٹر ریڈر زخمی ہو گیا ہے۔
ڈی آئی خان پولیس کے مطابق خیبر پختونخوا کے ضلع ڈیرہ اسماعیل خان کے علاقے خیر آباد کالونی میں میٹرریڈرعصمت اللہ کونامعلوم ملزم نے فائرنگ کرکے زخمی کردیا ہے۔
پولیس کا کہنا ہے کہ میٹر ریڈر کی موٹر سائیکل پر بھی 3 فائر کیے گئے ہیں جبکہ ملزم واردات کے بعد فرار ہو گیا۔ ’متعلقہ تھانے میں ابتدائی رپورٹ درج کردی گئی ہے جبکہ فائرنگ کرنے والے ملزم کی تلاش جاری ہے۔‘
ترجمان پیسکو عثمان سلیم نے بھی واقعے کی تصدیق کر تے ہوئے وی نیوز کو بتایا کہ واقعہ ڈی آئی خان کے علاقے درابن میں پیش آیا ہے۔
ترجمان پیکسو کے مطابق میٹر ریڈرڈیوٹی کے بعد واپس گھر جا رہے تھے کہ راستے میں نامعلوم ملزم نے ان پر فائرنگ کردی۔ ملزم نے 5 فائر کیے جن میں سے ایک گولی میٹر ریڈر کی ٹانگ پر لگی۔
’میٹر ریڈر کو اسپتال منتقل کر دیا گیا ہے جہاں اس کی حالت خطرے سے باہر ہے۔‘
عثمان سلیم کے مطابق سرکاری اہلکار صرف میٹر ریڈنگ کی ڈیوٹی پر تھے میٹر یا بجلی منطقع کرنے نہیں گئے تھے، معلومات کے مطابق نقاب پوش حملہ آور فائرنگ کے بعد فرار ہونے میں کامیاب ہو گیا۔
انہوں نے بتایا کہ پولیس ٹیم بھی اسپتال پہنچ گئی ہے جبکہ پیسکو حکام نے ایف آئی آر کے لیے پولیس کو دراخوست دے دی ہے۔
