روس نے اپنی سرحدوں پر دنیا کا مہلک ترین بین البراعظمی بیلسٹک میزائل (Sarmat) نصب کر دیا ہے۔
روسی خبر رساں ادارےآر آئی اے‘ کی ایک رپورٹ کے مطابق ماسکو کے خلائی ادارے راسکوموس (Rascomos) کے سربراہ یوری بوریسوو نے جمعہ کو ہونے والی ایک بریفنگ کے دوران اس بات کی تصدیق کی ہے کہ روس کے بین البراعظمی بیلسٹک میزائل (Sarmat) کومبیٹ الرٹ پوزیشن پر نصب کیا جا چکا ہے۔
ادھر وائٹ ہاؤس کے ترجمان جان کربی نے کہا ہے کہ وہ فی الوقت روسی Sarmat میزائلوں کو نصب کیے جانے کی اطلاعات کی تصدیق نہیں کر سکتے۔
واضح رہے کہ روس نے گزشتہ برس اپریل میں اپنے نئے بین البراعظمی بیلسٹک میزائل(Sarmat) کا کامیاب تجربہ کیا تھا۔ اس میزائل کو دنیا کا خطرناک ترین میزائل قرار دیا گیا تھا۔ 200 ٹن وزنی Sarmat میزائل 10 سے زائد نیوکلیئر وارہیڈز لے جاسکتا ہے اور18 ہزار کلو میٹر رینج تک اپنے ہدف کو نشانہ بنا سکتا ہے۔ ںیٹو افواج اس میزائل کو ’شیطان‘ کے نام پکارتی ہیں۔
اس میزائل کے کامیاب تجربے کے موقع پر روسی صدر ولادمیر پیوٹن نے کہا تھا کہ اس میزائل کا کوئی ثانی نہیں اور خبردار کیا تھا کہ یہ میزائل روس کے خلاف جارحانہ عزائم رکھنے والوں کو دوبار سوچنے پرمجبور کر دے گا۔