راولپنڈی سے اسلام آباد جانے والی میٹروبس کے انجن میں رحمان آباد اسٹیشن کے قریب اچانک آگ لگ گئی، مسافروں نے بس کے شیشے توڑ کر چھلانگیں لگا دیں، جس کے نتیجے میں خاتون سمیت 2 افراد زخمی ہو گئے۔
میڈیا رپورٹس کے مطابق بس میں اچانک دھواں بھر گیا، آتشزدگی کا علم ہوتے ہی مسافروں نے بھاگنا شروع کر دیا، اور بھگدڑ مچ گئی، لوگوں نے چلتی بس سے چھلانگیں لگائیں۔
مزید پڑھیں
ریسکیو 1122 کے ترجمان نے بتایا ہے کہ امدادی ٹیموں نے موقع پر پہنچ کر خاتون سمیت دونوں زخمیوں کو بینظیر بھٹو اسپتال منتقل کر دیا ہے۔
بس میں آگ لگنے کے باعث میٹرو بس سروس ایک گھنٹے تک معطل رہی جس کی وجہ سے شہریوں کو مشکلات کا سامنا کرنا پڑا۔
دوسری جانب میٹرو بس حکام نے بتایا ہے کہ انجن میں خرابی کے باعث بس میں دھواں بھرنے سے بھگدڑ مچی جس سے مسافر پریشان ہوئے۔
انہوں نے وضاحت کی کہ آتشزدگی کی وجہ سے کسی مسافر کو نقصان نہیں ہوا، بھگدڑ مچنے کی وجہ سے 2 افراد زخمی ہوئے۔
واضح رہے کہ اس سے قبل 2017 میں رحمان آباد اسٹیشن پر ہی میٹرو بس کو حادثہ پیش آیا تھا جس کے نتیجے میں 19 سالہ طالبہ گر جاں بحق ہو گئی تھی۔
