ایران نے القاعدہ کے نئے سربراہ سیف العدل کی ایران میں موجودگی کے امریکی دعوے کو مسترد کر دیا ہے۔
خبر رساں ادارے کے مطابق امریکی محکمہ خارجہ کے دعویٰ کے رد عمل میں ایرانی وزیر خارجہ امیر عبداللہیان نے کہا ہے کہ القاعدہ رہنما سیف العدل کے ایران میں موجود ہونے کا امریکی دعویٰ غلط ہے، القاعدہ رہنما کے بارے میں خبریں ایران سے جوڑنا مضحکہ خیز ہے۔
امیرعبداللہیان کا کہنا تھا کہ القاعدہ اور داعش کو پیدا کرنے والے ہی پوری دنیا میں دہشت گردی پھیلانے کے ذمہ دار ہیں۔
واضح رہے کہ امریکی محکہ خارجہ نے دعویٰ کیا تھا کہ ایران میں مقیم مصری نژاد سیف العدل کو القاعدہ کا نیا سربراہ بنایا گیا ہے۔ وہ بلامقابلہ سربراہ مقرر ہوا ہے
امریکی محکمہ خارجہ نے دعویٰ کیا کہ اقوام متحدہ اور امریکی اندازے کے مطابق القاعدہ کا نیا سربراہ ایران میں موجود ہے۔ ایران کے القاعدہ رہنمائوں کی محفوظ پناہ گاہ ہونے کی یہ ایک اور مثال ہے۔
واضح رہے کہ دہشت گرد تنظیم القاعدہ کا نیا سربراہ 62 سالہ سیف العدل القاعدہ کا پرانا گارڈ اور مصری اسپیشل فورسز کا سابق لیفٹیننٹ کرنل ہے۔ امریکا نے اس کے سر کی قیمت دس ملین ڈالر لگا رکھی ہے۔
