بھارت کے سابق کرکٹر اور بھارتیہ جنتا پارٹی (بی جے پی) کے دہلی سے رکن پارلیمان گوتم گمبھیر اکثر سماجی رابطوں کی ویب سائٹس پر اپنی متنازع پوسٹوں کی وجہ سے خبروں کی زینت بنے رہتے ہیں۔
گزشتہ روز سماجی رابطے کی ویب سائٹ ایکس پر گوتم گمبھیر ایک بار پھر ٹرینڈنگ لسٹ کا حصہ اس وقت بنے جب ان کی ایک ویڈیو وائرل ہوئی۔ وائرل ویڈیو میں دیکھا جاسکتا ہے کہ وہ اسٹیڈیم کے اندر جا رہے ہیں اور اسی دوران گیلری میں بیٹھے شائقین کی جانب سے ’کوہلی کوہلی‘ اور ’دھونی دھونی‘ کے نعروں کی آوازیں سنائی دیتی ہیں۔
ان نعروں کے جواب میں وہ پیچھے مڑ کے دیکھتے ہیں اور نعرے لگانے والے شائقین کو نامناسب اشارہ کرتے ہوئے چلے جاتے ہیں۔ ایکس پر ویڈیو وائرل ہوئی تو جہاں صارفین نے ان کو اس رویے پر تنقید کا نشانہ بنایا وہیں سابق کرکٹرز نے بھی ان کو خوب آڑے ہاتھوں لیا۔
انڈین خبر رساں ایجنسی ’اے این آئی‘ کو انٹرویو دیتے ہوئے گوتم گمبھیر نے وضاحت کی کہ انہوں نے کوہلی یا دھونی کے نعروں پر نہیں بلکہ انڈیا مخالف نعروں کے جواب میں ایسا رویہ اپنایا تھا۔
اے این آئی کی رپورٹ کے مطابق گوتم گمبھیر کا کہنا تھا کہ کچھ پاکستانی ناظرین نے بھارت مخالف اور کشمیر کے بارے میں قابلِ اعتراض نعرے لگائے، جس کے جواب میں ان کو یہ سب کرنا پڑا۔
گوتم گمبھیر کے اس نامناسب رویے پر جہاں پاکستانی صارفین نے ان کو تنقید کا نشانہ بنایا وہیں اب انڈین صارفین اور سیاسی شخصیات نے بھی ان کے اس رویے کو ناقابلِ برداشت قرار دیا ہے۔ انڈین صحافی ساکشی جوشی کا کہنا ہے کہ گوتم گمبھیر کے اس رویے پر ہم سب کا سر شرم سے جھک گیا ہے، کھیل کے میدان کے باہر بھی پتا نہیں ان کو کس بات کا غصہ رہتا ہے۔
ان کا مزید کہنا تھا کہ ان کو نہیں معلوم کہ کب ان کو سیاستدان بننا ہے اور کب ایک کرکٹر۔ ہم سب کو پتا ہے کہ وہ کوہلی سے کتنا چڑتے ہیں۔ اس ویڈیو کو دیکھ کر یقین ہوگیا ہے کہ ایک بڑا آدمی بھی امیچور ہوسکتا ہے۔
A BJP MP , An ex Cricketer , a commentator #GautamGambhir
caught on camera showing Middle Finger to @imVkohli’s fans
When asked – uses Nationalism as an Excuse
अब इनका रोज़ का हो गया है
अपने ही देश को बस अपने फ़ायदे के लिए इस्तेमाल करना जानते हैं pic.twitter.com/ygMhJgu10l
— Sakshi Joshi (@sakshijoshii) September 4, 2023
ایک اور انڈین صارف نے تبصرہ کرتے ہوئے لکھا کہ لگتا ہے گوتم گمبھیر ویرات کوہلی سے حسد کرتے ہیں۔
V true seems so jealous with virat .
— Mac (@Malcolm30031982) September 5, 2023
ایک اور صارف نے لکھا کہ بھارت مخالف نعرے ہوتے تو آواز آجاتی، یہ سب ویرات کوہلی کی وجہ سے کیا ہے جھوٹ مت بولیں۔
anti india slogans lage hote toh aawaz aati. Kohli koi anti india slogan nahi hai. Jhooth mat bol 😡 pic.twitter.com/kEf7yoCQYS
— चयन 🇮🇳 (@Tweet2Chayan) September 4, 2023
واضح رہے کہ گوتم گمبھیر نے اس سے قبل ایکس پر پوسٹ کرتے ہوئے لکھا کہ سوشل میڈیا پر جو کچھ دکھایا جاتا ہے اس میں مکمل صداقت نہیں ہوتی ہے۔ لوگ جو کچھ دکھانا چاہتے ہیں دکھاتے ہیں۔ وائرل ویڈیو کی حقیقت یہ ہے کہ اگر کوئی بھارت مخالف نعرے لگاتا ہے اور کشمیر کے بارے میں بات کرتا ہے تو سامنے والا شخص ردعمل تو ظاہر کرے گا یا پھر وہ ہنس کر چلا جائے گا؟