بی آئی ایس پی کا اہم اجلاس، ایشیائی ترقیاتی بینک کے وفد کی شرکت

سیکریٹری بی آئی ایس پی عامر علی احمد کی زیر صدارت بینظیر انکم سپورٹ پروگرام ہیڈ کوارٹر میں ایشیائی ترقیاتی بینک (ADB) کے سہ فریقی پورٹ فولیو جائزہ مشن کا اجلاس منعقد ہوا۔ اجلاس کا مقصد سماجی تحفظ کے ترقیاتی منصوبے اور مربوط سماجی تحفظ کے ترقیاتی پروگرام سمیت جاری منصوبوں کا جائزہ لینا تھا۔ ایشیائی بینک کے وفد کی سربراہی کنٹری ڈائریکٹر مسٹر یونگ یی نے کی۔

اجلاس کے دوران سیکریٹری بی آئی ایس پی عامر علی احمد نے کہاکہ مستحقین کو مالی معاونت فراہم کرنا بی آئی ایس پی کے بنیادی مقاصد میں شامل ہے۔ انہوں نے تمام اسٹیک ہولڈرز کو باہمی تجربات سے سیکھنے اور ٹیم ورک کی اہمیت پر زور دیا۔

سیکرٹری بی آئی ایس پی نے مستحقین کی شکایات کے ازالے کے جامع نظام کی تشکیل کے لیے تمام سطحوں پر انضمام کو یقینی بنانے اور ایک مضبوط فالو اپ میکانزم کے قیام پر زور بھی دیا۔ انہوں نے کہاکہ مستحقین کے وقار کا تحفظ بی آئی ایس پی کی ترجیحات میں شامل ہے۔

ڈائریکٹر IC&C راشد امتیاز نے سماجی تحفظ کے ترقیاتی منصوبے کا تفصیلی جائزہ پیش کیا جبکہ ڈی جی (NSER/CCT) نوید اکبر نے وفد کو مربوط سماجی تحفظ کے ترقیاتی پروگرام پر بریفنگ دی۔

ایشیائی ترقیاتی بینک کے کنٹری ڈائریکٹر مسٹر یونگ یی نے اے ڈی بی اور بینظیر انکم سپورٹ پروگرام کے درمیان جاری تعاون پر اپنے اطمینان کا اظہار کیا۔ انہوں نے بی آئی ایس پی کے ذریعے گزشتہ مالی سال میں 175 ملین امریکی ڈالر کی تیز رفتار اور شفاف تقسیم کی تعریف کی۔ مسٹر یی نے اے ڈی بی کی جانب سے مسلسل تعاون اور شراکت داری کی یقین دہانی کرائی۔

ایشیائی ترقیاتی بینک (ADB) کے وفد میں کنٹری ڈائریکٹر مسٹر یونگ یی سمیت مسٹر دنیش شیواکوٹی، ہیڈ پراجیکٹ ایڈمنسٹریشن، پراجیکٹ آفیسر ہما عنبرین، سینیئر پراجیکٹ آفیسرعمر بن ضیا اور دیگر شامل تھے۔