اقوام متحدہ ترقیاتی پروگرام کے پروگرام مینجمنٹ یونٹ ( یو این ڈی پی ۔ پی ایم یو) کی جانب سے میڈیا نمائندگان کو ایچ آئی وی /ایڈز کے بارے میں آگاہ کرنے کے لئے دو روزہ انٹرایکٹو ورکشاپ اور مشاورتی سیشن کا انعقاد کیا گیا۔
تقریب میں 30 سے زائد میڈیا اداروں کے شرکاء نے شرکت کی۔ ورکشاپ کا آغاز یو این ڈی پی کی نیشنل پروگرام سپیشلسٹ ڈاکٹر ناشمیہ محمود کے افتتاحی خطاب سے ہوا۔
انہوں نے کہا کہ میڈیا صرف ایک آئینہ نہیں ہے جو حقیقت کی عکاسی کرتا ہے بلکہ ایک طاقتور ٹول ہے جو اسے تشکیل دینے کے قابل ہے۔
پہلا سیشن
انہوں نے اس بات پر زور دیا کہ ورکشاپ صرف ایک تربیتی سیشن سے زیادہ نہیں جو ایک ایسے موضوع کے بارے میں درست، ہمدردانہ معلومات پھیلانے میں میڈیا کے کردار کی ازسرنو وضاحت کرنے کا ایک موقع ہے جو طویل عرصے سے بدنامی اور غلط فہمی کا شکار ہے۔ پہلے سیشن میں ’ایچ آئی وی/ایڈز کو سمجھنے اور بدنما داغ پر قابو پانے‘ کی آگاہی مبشر اکرم نے دی۔
دوسرا سیشن
دوسرے سیشن میں اس موضوع پر میڈیا رپورٹنگ کے لیے اخلاقی ذمہ داریوں کو اجاگر کیا گیا، جس کی سربراہی سینیئر صحافی اور پیمرا کے سابق چیئرمین ابصار عالم نے کی۔
حساس معاملے کی کوریج کرتے ہوئے اعلیٰ اخلاقی معیارات پر عمل کریں
انہوں نے صحافیوں پر زور دیا کہ وہ اس حساس معاملے کی کوریج کرتے ہوئے اعلیٰ اخلاقی معیارات پر عمل کریں۔ ہم ایچ آئی وی/ایڈز کے بارے میں کس طرح بات کرتے ہیں اس سے فرق پڑتا ہے کیونکہ الفاظ کمیونٹیز کو الگ تھلگ یا مربوط کر سکتے ہیں۔
ڈاکٹر عارف سلیم نے تیسرے سیشن، ’انسانی ایچ آئی وی/ایڈز سے متعلق آگاہی کے لیے مؤثر رویے کی تبدیلی کی کمیونیکیشن (بی سی سی) حکمت عملی‘ کے بارے میں آگاہ کیا۔
2 روزہ ورکشاپ میں سوال و جواب کے سیشنز اور پرجوش مباحثے شامل تھے۔ ڈاکٹر محمود نے اپنے اختتامی بیان میں کہا کہ یہاں کی اجتماعی دانشمندی میڈیا کی ایچ آئی وی/ایڈز کو سمجھنے اور ذمہ داری سے رپورٹنگ کرنے کے عزم کا ثبوت ہے۔
انہوں نے کہا کہ اقوام متحدہ ترقیاتی پروگرام وفاقی اور صوبائی دارالحکومتوں میں پاکستان میں ایچ آئی وی/ایڈز سے متاثرہ کمیونٹیز کی تصویر کشی کے حوالے سے بڑھتی ہوئی حساسیت کے معاملے پر پانچ ایسی سرگرمیاں منعقد کر رہا ہے۔
