ایشیا کپ 2023 کے سپر 4 مرحلے میں بھارت کے ساتھ ہائی ولٹیج ٹاکرے کے لیے پاکستان کی قومی ٹیم کا اعلان کر دیا گیا ہے۔
کولمبو سری لنکا میں کھیلے جانے والے ایشیا کپ کے سپر 4 مرحلے میں بھارت کے خلاف میچ کے لیے پاکستان نے اپنے پلیئنگ 11 کا اعلان ہفتہ کے روز کیا ہے۔
اعلان کے مطابق پاکستان بھارت کے خلاف وہی ٹیم لے کر میدان میں اترے گا جس نے بنگلہ دیش کے خلاف آخری میچ کھیلا تھا اور بنگلہ دیش کو 7 وکٹوں سے شکست دی تھی۔
پاکستان کی ٹیم میں 3 فاسٹ باؤلرز، ایک فاسٹ باؤلنگ آل راؤنڈر اور 3 اسپن آل راؤنڈر شامل ہیں۔
فاسٹ باؤلنگ کے شعبے میں شاہین آفریدی، نسیم شاہ اور حارث رؤف کے علاوہ فہیم اشرف بھی شامل ہیں۔
اسپن باؤلنگ کے شعبے میں نائب کپتان شاداب خان، افتخار احمد اور سلمان علی آغا شامل ہوں گے جب کہ بیٹنگ کے شعبے میں ٹاپ آرڈر میں فخر زمان، امام الحق اور کپتان بابر اعظم شامل ہیں اور محمد رضوان بطور بیٹر اور وکٹ کیپر ٹیم کا حصّہ ہیں۔
پاکستان ایشیا کپ سپر 4 مرحلے کا اپنا دوسرا میچ اتوار کو کولمبو میں بھارت کے خلاف کھیلے گا۔
