قائم مقام افغان قونصل جنرل مولوی گل حسن نے نگراں وزیراعلی بلوچستان میر علی مردان خان ڈومکی سے ملاقات میں صوبے کی مختلف جیلوں میں قید افغان باشندوں کے مسائل کی نشاندہی اور حل کی درخواست کی ہے۔
نگراں وزیر اعلی بلوچستان نے افغان قونصل جنرل کو یقین دلایا کہ ملکی قوانین اور وفاقی حکومت کی پالیسی کے مطابق صوبائی حکومت تمام مسائل کے حل کے لیے افغان قونصلیٹ سے مکمل تعاون کرے گی۔ ’افغان قونصل جنرل کی جانب سے قیدیوں سمیت اٹھائے گئے دیگر مسائل وفاقی حکومت کے سامنے رکھیں گے۔‘
افغان قونصل جنرل کا کہنا تھا کہ نئی قائم ہونے والی افغان حکومت پاکستان کے ساتھ مضبوط اور خوشگوار تعلقات پر یقین رکھتی ہے ۔ پاکستان کے ساتھ باہمی تعلقات کا فروغ افغانستان کی نئی حکومت کی ترجیحی پالیسی ہے۔
نگراں وزیراعلی میر علی مردان ڈومکی کا کہنا تھا کہ برادر ملک افغانستان اور پاکستان بالخصوص بلوچستان کے عوام کے درمیان تعلقات صدیوں پر محیط ہیں۔ مسلمان اور ہمسایہ ہونے کے ناطے افغان مہاجرین کا خیال رکھنا پاکستان کا فرض ہے۔
ملاقات میں اتفاق کیا گیا کہ دونوں ممالک کے سرحدی علاقوں کے عوام کا مذہب زبان اور ثقافت ایک جیسی اور دیرینہ تعلقات قائم ہیں۔ افغان قونصل جنرل نے طویل عرصہ سے افغان مہاجرین کی مہمانداری پر حکومت پاکستان اور پاکستانی عوام کا شکریہ بھی ادا کیا۔
افغان قونصل جنرل نے صوبے کی مختلف جیلوں میں قید افغان باشندوں کے مسائل کی نشاندہی اور حل کی درخواست کرتے ہوئےکہا وزیراعلی سے ملاقات کا مقصد سرحدی معاملات اور تجارت کے فروغ کے ساتھ ساتھ افغان مہاجرین کے مسائل اجاگر کرنا تھا۔
