نگراں وزیراعظم انوار الحق کاکڑ نے وزیراعلیٰ سیکرٹریٹ گلگت میں یادگار شہدا پر حاضری کے دوران فاتحہ خوانی کی اور پھول چڑھائے۔
منگل کو وزیراعلیٰ سیکریٹریٹ گلگت آمد پر نگراں وزیراعظم کو گارڈ آف آنر پیش کیا گیا۔ اس موقع پر نگراں وفاقی وزیرداخلہ سرفراز بگٹی اورنگراں وفاقی وزیر اطلاعات ونشریات مرتضیٰ سولنگی، گورنر گلگت بلتستان سید مہدی شاہ بھی اس موقع پر موجود تھے ۔
چیف سیکیرٹری گلگت بلتستان نے نگران وزیراعظم کو مختلف امور پر بریفنگ دی۔ نگراں وزیراعظم نے اسکول کے طلبا و طالبات سے بھی ملاقات کی اور انہوں نے طلبہ کے بنائے گئے مختلف ماڈلز کا معائنہ کیا۔
انوارالحق کاکڑ نے طلبہ کی پینٹنگز، تعلیمی،سائنسی و توانائی سے متعلق ماڈلز میں گہری دلچسپی کا اظہارکیا اوربچوں کےماڈلز اورطلبا و طالبات کی صلاحیتوں اور ان کی حوصلہ افزائی کرنے والے اساتذہ کی خدمات کوسراہا۔
انہوں نے ایک طالبہ کے سائنسی ماڈل کو سراہتے ہوئے اسے تعریفی سند دینے کی ہدایت کی۔ نگراں وزیراعظم نے طلبہ سے موسمیاتی تبدیلیوں کے اثرات سے متعلق سوالات کیے۔ نگران وزیراعظم نے کہا کہ ہمارے بچوں میں سائنس کے میدان میں آگے بڑھنے کی مکمل صلاحیت موجود ہے۔
نگراں وزیرِ اعظم انوار الحق کاکڑ سے وزیرِ اعلی گلگت بلتستان گلبر خان کی ملاقات
قبل ازیں نگراں وزیرِ اعظم انوار الحق کاکڑ سے وزیرِ اعلیٰ گلگت بلتستان گلبر خان نے ملاقات کی جس میں انہوں نے نگراں وزیراعظم کو گلگت میں جاری ترقیاتی منصوبوں پر پیشرفت کے حوالے سے آگاہ کیا ۔
وزیراعظم آفس کے میڈیا ونگ سے جاری بیان کے مطابق اس موقع پر وزیرِ اعلی نے گلگت بلتستان میں عوامی فلاحی منصوبوں بالخصوص صحت و تعلیم کے شعبوں کی ترقی کے لیے حکومت کے اقدامات پر بریفنگ دی۔
