ایشیا کپ میں شکست کے باوجود پاکستان ورلڈ کپ کے لیے خطرناک ٹیم ہے، ناصر حسین

سابق انگلش کپتانوں (ناصر حسین اور آؤن مورگن) نے پاکستان کرکٹ ٹیم کو ورلڈ کپ کے لیے خطرناک ٹیم قرار دیا ہے۔

ناصر حسین کا کہنا تھا کہ پاکستان کے پاس اس وقت ایک روزہ میچز میں دنیا کے نمبر ون بیٹر بابر اعظم موجود ہیں اور ہم سب جانتے ہیں کہ وہ کیا کرسکتے ہیں۔

غیر ملکی اسپورٹس چینل میں گفتگو کرتے ہوئے سابق انگلش کپتان اور کمنٹیٹر ناصر حسین نے کہا کہ پاکستان کے تین پیسرز بہت خطرناک ہیں۔ شاہین شاہ آفریدی مکمل فٹ ہیں جبکہ حارث رؤف اور نسیم شاہ کی فٹنس پر کچھ بھی کہنا قبل از وقت ہے کیونکہ بابر اعظم نے کہا ہے کہ اکتوبر میں ہونے والے ورلڈ کپ کے پہلے میچ میں نسیم شاہ دستیاب نہیں ہوں گے۔

انہوں نے مزید کہا کہ فخر زمان اس وقت بری فارم میں چل رہے ہیں مگر وہ ایک خطر ناک بیٹر ہیں جو کم بیک کی صلاحیت رکھتے ہیں۔

اسپنرز کی کارکردگی کے حوالے سے سابق انگلش کپتان نے بتایا کہ پاکستان کے لیے لمحہ فکریہ انکے اسپنرز ہیں۔ شاداب خان اس وقت مکمل طور پر فارم سے باہر ہیں جبکہ انڈیا میں میچ جیتنے کے لیے اسپنرز کا مرکزی کردار ہوگا۔

بھارت میں ہونے والے کرکٹ ورلڈ کپ میں پاکستان کی کارکردگی کے حوالے سے انہوں نے کہا کہ پاکستانی ٹیم نیوزی لینڈ کی طرح بڑے ٹورنامنٹ میں پرفارم کرنے والے بڑی اور خطرناک ٹیم ہے جو کسی بھی لمحے فارم میں آ سکتی ہے ایک دن وہ آپکو مایوس کرے گی مگر دوسرے دن اپنی کارکردگی سے آپکو حیران کر دے گی۔

🗣️ "They've got the number one ranked batter in Babar Azam"
🗣️ "Their spinners are a little out of form"

Nasser Hussain and Eoin Morgan discuss how Pakistan are looking ahead of the World Cup 🇵🇰 pic.twitter.com/cos2KX24jK

— Sky Sports Cricket (@SkyCricket) September 15, 2023

انہوں نے مزید کہا کہ اگرچہ پاکستان کا پہلا میچ نیدر لینڈ کے خلاف ہے مگر آپ اس ٹیم کو ہلکا نہیں لے سکتے۔ رواں برس ہونے والے آئی سی سی کرکٹ ورلڈ کپ میں کوئی بھی ٹیم آسان نہیں ہے اس لیے اگر آپکو ورلڈ کپ جیتنا ہے تو بالکل پہلے ہی میچ سے اپنا بہترین کھیل پیش کرنا ہو گا۔

سابق انگلش کپتان آئون مورگن بھی ناصر حسین کے ہمراہ پینل میں موجود تھے انکا کہنا تھا کہ پاکستان کو ایشا کپ میں شکست سے سبق سیکھ کر آگے بڑھنا ہو گا میرے نزدیک پاکستان ایک بہت خطرناک ٹیم ہے اور بڑے ٹورنامنٹس میں اسکی کارکردگی اچھی ہوتی ہے۔

آؤن مورگن کا مزید کہنا تھا کہ پاکستان ٹیم کو اس وقت فٹنس کے مسائل کا سامنا ہے انکے پیسرز انجرڈ ہونے کی وجہ سے باہر ہیں۔

پاکستان کرکٹ ٹیم کے اسپنرز پر بات کرتے ہوئے سابق انگلش کپتان نے کہا کہ شاداب خان ایک اچھے اسپنر ہیں مگر آئی سی سی ایونٹس میں وہ آل راوںڈر کا کردار ادا کر سکتے ہیں کیونکہ ان میں یہ کرنے کی صلاحیت موجود ہے۔

انہوں نے مزید کہا کہ فہیم اشرف بھی فٹنس کے مسائل کا شکار ہیں۔ آپکو ان کھلاڑیوں کی فٹنس چاہیے کیونکہ اگر آپ کا ٹاپ آرڈر ناکام ہوجائے تو یہ لوگ نیچے رہ کر ٹیم کو سنبھال سکیں۔

یاد رہے کہ آئی سی سی ورلڈکپ کا انعقاد بھارت میں ہو رہا ہے، جس کا باقاعدہ آغاز 5 اکتوبر سے ہوگا اور پاکستانی ٹیم اپنا پہلا میچ 6 اکتوبر کو  نیدرلینڈ کے خلاف کھیلے گی جبکہ پاک بھارت میچ 14 اکتوبر کو احمد آباد میں کھیلا جائے گا۔