ایشین گیمز کے والی بال ایونٹ میں پاکستان نے جیت کا سلسلہ جاری رکھتے ہوئے تائیوان کو بھی شکست دے کر اگلے مرحلے کے لیے کوالیفائی کرلیا۔
چین کے شہر ہینگزو میں بدھ کو کھیلے گئے اپنے دوسرے میچ میں قومی والی بال ٹیم نے تائیوان کے خلاف 0-3 سے کامیابی حاصل کی۔ پاکستانی ٹییم نے تائیوان کو خلاف 18-25, 20-25 اور 19-25 سے شکست دی۔
قبل ازیں گروپ ڈی میں شامل پاکستان نے اپنے پہلے میچ میں منگولیا کے خلاف 0-3 سے کامیابی حاصل کی تھی۔ اس میچ کا اسکور میچ کا اسکور 17-25، 19-25 اور 20-25 تھا۔ اپنی دوسری فتح کے بعد پاکستان گروپ میں سرفہرست ہے۔
پول اے میں میزبان چین، کرغزستان اور قازقستان شامل ہیں جبکہ دفاعی چیمپئن ایران کو پول بی میں نیپال اور بحرین کے ساتھ شامل کیا گیا ہے۔ کوریا، بھارت اور کمبوڈیا میں پول سی، پول ای میں قطر، تھائی لینڈ اور ہانگ کانگ شامل ہیں جبکہ جاپان، انڈونیشیا اور افغانستان پول ایف میں ہیں۔
اس طرح قومی ٹیم نے راؤنڈ آف 12 کے لیے کوالیفائی کرلیا جہاں اس کا مقابلہ ہندوستان، کمبوڈیا یا جنوبی کوریا میں سے کسی ایک سے ہوگا۔