صدر عارف علوی نے کہاکہ مدینہ کی ریاست تب قائم ہوئی جب نبی اکرم ﷺ نے وہاں انصاف کا نظام قائم کیا، اور سب سے بڑھ کر غریب کا خیال رکھا جس کے بعد ایک انقلاب برپا ہوا۔
اسلام آباد میں منعقد ہونے والی سیرت النبی ﷺ کانفرنس سے خطاب کرتے ہوئے صدر پاکستان عارف علوی نے کہاکہ حضور اکرم ﷺ نے ایک ایسی ٹیم بنائی جس نے پوری دنیا میں انقلاب برپا کر دیا، جو رہتی دنیا تک یاد رکھی جائے گی۔
عارف علوی نے کہاکہ نبی اکرم ﷺ نے اشرافیہ اور ظلم و جبر کے نظام کے خلاف آواز اٹھائی، اس کے بعد ایک ایسی ٹیم تیار کی جس نے ان کے احکامات کی روشنی میں دنیا میں اپنی حکومت قائم کی۔
ان کا کہنا تھا کہ اسلام کا نظام انصاف پر مبنی ہے، اسلام نے ہمیشہ ظلم و جبر کے خلاف لڑنے کا درس دیا ہے۔ اگر ہم اسلام کو سمجھیں تو ہمیں معلوم ہو جائے گا کہ نبی ﷺ کی تعلیمات ہی ہمارے لیے بہترین کامیابی ہے۔
