پاکستان تحریک انصاف (پی ٹی آئی) نے سائفر کیس میں چیئرمین پی ٹی آئی عمران خان اور وائس چیئرمین شاہ محمود قریشی کے خلاف جمع کرائے گئے چالان کو یکسر مسترد کر دیا ہے۔
ترجمان تحریک انصاف نے کہا ہے کہ عمران خان اور شاہ محمود قریشی کے خلاف جمع کرایا گیا چالان سائفر کے جعلی اور بوگس مقدمے کی طرح بے معنی اور بے وقعت ہے۔
ترجمان کے مطابق سائفر اپنی اصلی حالت میں آج بھی دفتر خارجہ میں موجود ہے جو کہ سابق وزیر اعظم پر لگائے گئے الزامات کو بے بنیاد ثابت کرتاہے۔
مزید پڑھیں
انہوں نے کہاکہ سائفر کو وفاقی کابینہ نے اپنے اختیارات کے تحت ڈی کلاسیفائی کیا جس کے بعد آفیشل سیکرٹ ایکٹ کو لاگو نہیں کیا جا سکتا اور یہ مقدمہ اپنی موت آپ مر جاتا ہے۔
ترجمان پی ٹی آئی نے کہاکہ چئیرمین تحریک انصاف عمران خان نے بار ہا سائفر کی آزادانہ اور غیر جانبدار تحقیقات کا مطالبہ کیا جس کے لیے چیف جسٹس اور صدر مملکت کوخطوط بھی ارسال کیے گئے لیکن آج تک کوئی پیش رفت نہیں ہو سکی۔
’جیل میں خفیہ ٹرائل سے لے کرسائفر کیس کی عدالتی کارروائی کو بلاجواز ملتوی کرنے تک بے انصافی کی نئی روایات قائم کی گئی ہیں‘۔
ترجمان پی ٹی آنے کہا ہے کہ ایک بے بنیاد مقدمے کی غیر قانونی کارروائی کے نتیجے میں سنائے جانے والے کسی فیصلے کی قانونی حیثیت ہوگی نا ہی قوم اسے قبول کرے گی۔
انہوں نے کہاک انصاف کے تقاضوں کو پورا کرنے کے لیے سائفر کے معاملے پر ایک آزادانہ اورمنصفانہ جوڈیشل کمیشن تشکیل دیا جائے اور اصل حقائق قوم کے سامنے لائے جائیں۔
