ورلڈ کپ وہ ٹیم جیتے گی جس کی باؤلنگ کا معیار بہت اچھا ہوگا، شاداب خان

پاکستان کرکٹ ٹیم کے نائب کپتان شاداب خان نے کہا ہے کہ بابر اعظم، محمد رضوان اور امام الحق ہمارے ایسے کھلاڑی ہیں جو نہ صرف فارم میں ہیں بلکہ ان کی کارکردگی میں تسلسل بھی ہے۔ تاہم میں سمجھتا ہوں کہ ورلڈ کپ وہ ٹیم جیتے گی جس کی باؤلنگ کا معیار بہت اچھا ہوگا۔ کیوں کہ یہاں کی کنڈیشنز میں آؤٹ کرنا اور رنز روکنا قدرے مشکل ہوتا ہے۔

بھارت کے شہر حیدر آباد میں میڈیا سے گفتگو میں شاداب خان نے کہا کہ جوش وجذبے کے ساتھ بھرپور استقبال اور خوش آمدید کہا گیا، اس پر بہت خوشی ہے۔ یہاں کی مہمان نوازی ہی نہیں بلکہ کھانے بھی بہت اچھے ہیں، ہمارے ساتھ آئے گورے بھی ان کھانوں پر لگ گئے ہیں، بہت لطف اٹھا رہے ہیں لگتا ہے کہ ہمارا وزن اور چربی بڑھ جائے گی۔ احمد آباد میں بھی ہمیں اسی طرح کی مہمان نوازی چاہیے۔

ایک سوال پر انہوں نے کہا کہ احمد آباد والا میچ ابھی دور ہے، اس سے پہلے بھی کئی میچ ہیں۔ بھارتی ٹیم میں مجھے روہت شرما پسند ہیں، وہ دنیا کا ایسا خطرناک بیٹسمین ہے جسے سیٹ ہونے کے بعد آؤٹ کرنا بے حد مشکل ہوتا ہے۔ میں چونکہ خود لیگ اسپنر ہوں تو اس لیے باؤلنگ میں مجھے کلدیپ پسند ہے۔

شاداب خان کا کہنا تھا کہ گرین شرٹس کے لیے ایشیا کپ بہت اچھا نہیں رہا لیکن کرکٹ کی یہی خوبصورتی ہے کہ غلطیوں سے سیکھا جاتا ہے۔ موقع ہوتا ہے کہ غلطیوں سے سیکھ کر اچھی سے اچھی کرکٹ کھیلنے کی کوشش کریں۔ ایشیا کپ کے بعد آرام کا موقع ملا، کیوں کہ کرکٹ اب مہارت کا نہیں ذہانت کا کھیل ہے۔ جسمانی آرام کے بعد اچھے فیصلے لینے کی صلاحیت بڑھتی ہے۔

ان کا کہنا تھا کہ بھارت کی کنڈیشنز بھی پاکستان کی طرح ہیں، نیوزی لینڈ کے ساتھ میچ میں وکٹ فلیٹ تھی، باؤنڈریز قریب تھیں، بالکل ایسے ہی تھا جیسے راولپنڈی میں کھیل رہے ہوں۔ آئندہ میچ میں بھی وکٹ دیکھ کر کنڈیشن کا اندازا ہو جائے گا۔