وائس ایڈمرل نوید اشرف کو پاک بحریہ کا نیا سربراہ مقرر کر دیا گیا ہے، وہ 7 اکتوبر کو ایڈمرل ظفر محمود عباسی کی جگہ ذمہ داریاں سنبھالیں گے۔
رجمان پاک بحریہ کے مطابق پاکستان نیوی کے وائس ایڈمرل نوید اشرف کو ایڈمرل کے عہدے پر ترقی دے دی گئی ہے، پاکستان نیوی کی کمانڈنٹ کی تبدیلی کی تقریب 7 اکتوبر کو اسلام آباد میں نیول ہیڈ کوارٹر میں ہو گی، تقریب میں نوید اشرف اپنے عہدے کا چارج سنبھالیں گے، ایڈمرل ظفر محمود عباسی چارج نوید اشرف کے حوالے کریں گے۔
وائس ایڈمرل نوید اشرف نے 1995 میں آپریشنز برانچ میں کمیشن حاصل کیا، نوید اشرف ڈیفنس یونیورسٹی اسلام آباد، امریکی نیول وار کالج، برطانیہ رائل کالج آف ڈیفنس اسٹڈیز سے فارغ التحصیل ہیں۔
نوید اشرف پاکستان نیوی میں اسٹاف عہدوں پر کام کا وسیع تجربہ رکھتے ہیں، وہ کمانڈ پاکستان فلیٹ اور کمانڈ نٹ پاک نیول اکیڈمی کے فرائض سر انجام دے چکے ہیں۔
وائس ایڈمرل نوید اشرف ڈپٹی چیف آف نیول اسٹاف آپریشنز، ڈپٹی چیف آف نیول اسٹاف ٹریننگ اینڈ پرسنیل، ڈپٹی چیف آف نیول اسٹاف ایڈمن کے عہدوں پر اپنے فرائض سر انجام دے چکے اور نیشنل ڈیفنس یونیورسٹی کے نائب صدر بھی رہے۔
نوید اشرف اس وقت نیول ہیڈ کوارٹر اسلام آباد میں چیف آف اسٹاف کی ذمہ داریاں سر انجام دے رہے ہیں، نوید اشرف کو ہلال امتیاز(ملٹری) اور تمغہ بسالت بھی عطا کیے گئے ہیں۔
