نوازشریف کی صحت اب کیسی ہے؟میڈیکل رپورٹ لاہور ہائیکورٹ میں جمع

نوازشریف کی صحت سے متعلق تازہ میڈیکل رپورٹ لاہور ہائیکورٹ میں جمع کرا دی گئی ہے۔ وکیل امجد پرویز نے رجسٹرار آفس میں نواز شریف کی میڈیکل رپورٹ جمع کرائی۔

نواز شریف کی لاہور ہائیکورٹ میں جمع کرائی گئی میڈیکل رپورٹ کے مطابق نواز شریف کو اب بھی دل کے عارضے کے مسائل ہیں۔ نواز شریف کو کورونا اور انجائنا کے باعث پاکستان آنے سے روک دیا گیا تھا۔

رپورٹ میں کہا گیا ہےکہ نواز شریف کو اب بھی فالو اپ چیک اپس کی ضرورت ہے۔ نواز شریف کو دی جانے والی ادویات کی تفصیل بھی رپورٹ کا حصہ ہے۔

برطانیہ کے رائل برومپٹن اسپتال نے نوازشریف کی میڈیکل رپورٹ جاری کی ہے۔ رپورٹ کنسلٹنٹ کارڈیالوجیسٹ پروفیسر کار لوڈی ماریو نے تیار کی ہے۔رپورٹ کے مطابق نواز شریف کی ماضی کی بائی پاس سرجری اور اینجوپلاسٹی کے سبب مسلسل چیک اپ کیا گیا۔

رپورٹ کے مطابق نوازشریف کی پہلے اینٹی انجائنل تھراپی کی بہتری کے لیے علاج کیا گیا، مرض کی علامتیں بڑھیں تو نواز شریف کی دوبارہ اینجو پلاسٹی کا فیصلہ کیا گیا تھا۔ ایجنو پلاسٹی نومبر 2022 میں کی گئی تھی۔