خادم حرمین شریفین شاہ سلمان بن عبدالعزیز کے سامنے منگل کو ریاض کے قصر یمامہ میں برادر اور دوست ممالک میں تعینات کیے جانے والے نئے سعودی سفیروں نے حلف اٹھا لیا۔
سرکاری خبررساں ادارے ایس پی اے کے مطابق انڈونیشیا کے لیے فیصل العامودی کونیا سفیر تعینات کیا گیا ہے۔
کیمرون، گھانا، قازقستان، زیمبیا، کوٹ ڈیوار، گبون، آسٹریلیا، فن لینڈ، گنی اور یورپی یونین میں بھی نئے سفیروں کا تقرر کیا گیا ہے۔
یورپی یونین اور یورپی ایٹمی انرجی سوسائٹی کے لیے خاتون سفیر ھیفا بنت عبدالرحمن الجدیع نے حلف اٹھاتے ہوئے کہاکہ ’وہ اپنے دین، اپنے بادشاہ او وطن کی مخلص رہیں گی۔ ریاست کا کوئی راز فاش نہیں کریں گی۔ ریاستی مفادات اور قوانین کا اندرون و بیرون ملک تحفظ اور اپنا فرض سچائی، ایمانداری اور اخلاص سے انجام دیں گی۔‘
تقریب میں نائب وزیرخارجہ انجینیئر ولید الخریجی اور خادم حرمین شریفین کے معاون نجی سیکریٹری تمیم السالم بھی موجود تھے۔
