پشتنوخوا ملی عوامی پارٹی کے رہنما محمود خان اچکزئی نے کہا ہے کہ پاکستان میں آئین موجود ہے غیر قانونی کوئی رہائش نہیں اختیار کرسکتا، اقوام متحدہ کے قوانین ہیں اور پاکستان میں بھی قانون ہے، ایسے میں زیادتی برادشت نہیں کریں گے۔ وہ پی کے میپ کے زیر اہتمام 7 اکتوبر 1983کے شہدا کی یاد میں منعقدہ جلسے سے خطاب کر رہے تھے۔
محمود خان اچکزئی نے جلسے سے خطاب میں کہا کہ ہندوستان میں سکھ، عیسائی، ہندو اور مسلمان سب ایک ساتھ رہتے ہیں۔ افغان مہاجرین کو بھی ہم نے آباد کیا ہے۔کسی کی جائیداد ضبط نہیں ہونے دیں گے۔
کسی کے گھر میں گھسنے کی اجازت نہیں دیں گے
ان کا کہنا تھا کہ افغان مہاجرین کو قانون کے مطابق واپس بھیجا جائے۔پاکستان کے قوانین میں موجود ہے کہ آپ یہاں پیدا ہوئے ہیں تو آپ پاکستان کے شہری ہیں۔
محمود خان اچکزئی کے مطابق قانونی اور غیرقانونی رہاش پذیر افراد کے لیے قوانین موجود ہیں۔بلا جواز رات کو کسی کے گھر میں گھسنے کی اجازت نہیں دیں گے۔
ہمیں بھی صوبہ دیا جائے
ان کا کہنا تھا کہ ہمارے صوبے میں بلوچ پشتون سندھی اور پنجابی سمیت دیگر اقوام اباد ہیں۔ پنجابی سندھی اور بلوچ صوبے رکھتے ہیں ہمیں بھی صوبہ دیا جائے۔
انہوں نے جلسے سے خطاب میں کہا کہ ہم ایٹمی طاقت ہیں لیکن بے روزگاری عروج پر ہے، پاک افغان سرحد سے غیر قانونی اسمگلنگ ہورہی ہے۔ سرحدوں میں موجود سیکیورٹی اہلکاروں کو سب معلوم ہے کونسی اشیاء اسمگلنگ ہورہی ہے۔
عسکری قیادت ملک کو مشکل سے نکالنے میں اپنا کردار ادا کرے
محمود خان اچکزئی کا کہنا تھا کہ پاکستان معدنیات سے مالامال ہے عسکری قیادت ملک کو مشکل سے نکالنے میں اپنا کردار ادا کرے۔ملک میں موجود معدنیات سے فائدہ اٹھائیں۔
اس موقع پر انہوں نے مطالبہ کیا کہ جمہوریت کے لیے جانوں کا نذرانہ دینے والے سیاسی رہنماوں کو سرکاری سطح پر شہید قراردیا جائے۔
جلسہ میں ملک کو بحرانوں سے نکالنے کے لیے تمام اسٹیک ہولڈرز کا اجلاس بلانے کے لیے قرارداد بھی پیش کی گئی۔
