پاکستان تحریک انصاف (پی ٹی آئی) کے رہنما فرخ حبیب کی جبری گمشدگی کے معاملے پر ان کی اہلیہ نے اپنے شوہر کی بازیابی کے لیے چیف جسٹس آف پاکستان کے نام خط لکھ دیا۔
اہلیہ کی جانب سے لکھے گئے خط میں چیف جسٹس آف پاکستان سے فرخ حبیب کی جبری گمشدگی کا فوری نوٹس لینے اور جلد از جلد بازیابی یقینی بنانے کی استدعا کی گئی ہے۔
اہلیہ نے لکھا کہ فرخ حبیب کی بازیابی کے لیے لاہور ہائیکورٹ میں حبسِ بے جا کی درخواست دائر کی گئی جس پر تاحال کوئی پیش رفت سامنے نہیں آئی ہے، عدالتی حکم کے باوجود حکام فرخ حبیب کے آئینی حقوق کی صریح خلاف ورزی کرتے ہوئے انہیں کسی بھی عدالت میں پیش کرنے میں ناکام رہے ہیں۔
مزید پڑھیں
انہوں نے لکھا کہ خدشہ ہے کہ ان کے شوہر کو اپنی سیاسی وابستگی تبدیل کرنے پر مجبور کرنے کے لیے شدید تشدد کا نشانہ بنایا جا رہا ہے۔ سیاسی رہنماؤں کے اغوا اور جبری گمشدیوں کے بڑھتے ہوئے واقعات تشویشناک ہیں جن میں اعلٰی عدلیہ کی مداخلت ناگزیر ہے۔
اہلیہ نے چیف جسٹس سے استدعا کی ہے کہ محترم چیف جسٹس سے ہمارے خاندان کے بنیادی حقوق کے محافظ کے طور پراس معاملے کا فوری نوٹس لیا جائے اور فرخ حبیب کی بازیابی کو یقینی بنایا جائے۔
